News
Loading...

விநாயகர் சிலைக் கரைப்பில் 16 பேர் நீரில் மூழ்கி உயிரிழப்பு

விநாயகர் சிலைக் கரைப்பில் 16 பேர் நீரில் மூழ்கி உயிரிழப்பு

மும்பை: மகாராஷ்டிரா மாநிலத்தின் பல்வேறு பகுதிகளில் விநாயகர் சதுர்த்தி கோலாகலமாக கொண்டாடப்பட்டு கடந்த சில நாட்களாக விநாயகர் சிலைகளை கரைத்து வருகின்றனர்.

கடந்த 24 மணி நேரங்களில் இன்று காலை வரை விநாயகர் சிலை கரைப்பில் ஈடுபட்டு 16 பேர் நீரில் மூழ்கி உயிரிழந்ததாக அதிகாரிகள் தெரிவித்துள்ளனர். மேலும் 2 பேர் மாயமாகியுள்ளதாக கூறப்பட்டுள்ளது.

நேற்று வியாழக்கிழமை நாசிக் பகுதியில் கனமழையையும் பொருட்படுத்தாமல் பக்தர்கள் விநாயகர் சிலைகளை கரைப்பில் ஆர்வத்துடன் ஈடுபட்டனர். கனமழை காரணமாக எதிர்பாராதவிதமாக ராணுவ வீரர் சந்தீப் சிர்ஷாத், ராமேஷ்வர் ஆகியோர் முசல்கோவன் குளத்தில் மூழ்கி பலியாகினர். இதேபோன்று நாசிக் சுற்றியுள்ள பல்வேறு கிராமப் பகுதிகளில் மொத்தமாக 7 பேர் நீரில் மூழ்கி பலியானதாக தெரிவிக்கப்பட்டுள்ளது.

இதேபோன்று வார்தா மாவட்டத்தில் விநாயகர் சிலைகளை கரைக்கும் போது செல்ஃபி புகைப்படம் எடுத்த 3 மாணவர்கள் நீரில் மூழ்கினர். அவர்களை மீட்க முயன்று ஆற்றில் குதித்த நண்பர்களை அப்பகுதி மக்கள் மீட்டனர்.

நான்டெட் அருகே பொதுப்பணி ஊழியர் ஒருவர் விநாயகர் சிலையை கரைக்க முயன்ற போது கோதாவரி நதியில் மூழ்கினார். அவரை காப்பாற்ற முயன்ற பள்ளி ஆசிரியர் பரமேஷ்வர் ஷேங்குல் ஆற்றில் அடித்துச் செல்லப்பட்டார். ஜல்கோவன் பகுதியில் 2 இளைஞர்கள் கங்கை நதியில் அடித்துச் செல்லப்பட்டனர். ஒருவரது சடலம் இன்னும் மீட்கப்படவில்லை என அதிகாரிகள் தெரிவித்துள்ளனர்.

இதேபோன்று புனேவில் இருவர் உயிரிழந்துள்ளனர். இந்நிலையில், நாக்பூர் பகுதியில் உள்ள ஹனுமன் கோவிலில் கணேஷ்உத்சவ் மண்டபத்தின் அருகே பிரசாதம் தயார் செய்துக் கொண்டிருந்த மனிஷா(27), சண்டையைத் தீர்க்க முயன்று எதிர்பாராதவிதாக உயிரிழந்தார். மனிஷாவின் தம்பியும் மற்றொருவரும் அடித்துக் கொண்டு சண்டையிட்டுக் கொண்டிருந்தபோது அவர்களை விலக்க முயன்ற மனிஷா தள்ளுமுள்ளில் கீழே விழுந்து பரிதாபமாக உயிரிழந்தார்.

முகநூலில் எங்கள் செய்திகளை படிக்க க்ளிக் செய்யவும்


Loading...