News
Loading...

​ தமிழ் இளைஞரை அடித்து துவைத்த கன்னட இளைஞர்கள்

​ தமிழ் இளைஞரை அடித்து துவைத்த கன்னட இளைஞர்கள்

தனது முகநூல் பதிவில் கன்னட நடிகர்களை விமர்சித்து இருந்த தமிழ் இளைஞனை கன்னட இளைஞர்கள் அடித்து உதைத்த சம்பவம் அதிர்ச்சியை ஏற்படுத்தியுள்ளது. இந்த சம்பவத்திற்கு தமிழகத்தில் இருந்து பயங்கர கண்டனக் குரல்கள் கிளம்பியுள்ளது.

பெங்களூரில் உள்ள பனசங்கரி என்ற தனியார் பொறியியல் கல்லூரியில் படித்து வருபவர் சந்தோஷ். இவர் நேற்று மதியம் (சனிக்கிழமை மதியம்) கன்னட நடிகர்கள் குறித்து தனது முகநூல் பகுதியில் பதிவு செய்து இருந்தார். காவிரியுடன் தொடர்புடைய கன்னட நடிகர்களின் கருத்தை எதிர்த்து பதிவு செய்து இருந்தார்.

இதையடுத்து, நேற்று இந்த இளைஞரை கன்னட இளைஞர்கள் சிலர் பொது இடத்திற்கு அழைத்து வந்து அடித்து, உதைத்து துன்புறுத்தினர். தனது முகநூல் பதிவிற்கு அவர்களிடம் மன்னிப்பு கோரிய பின்னர் அந்த இடத்தில் இருந்து சந்தோஷ் சென்றுவிட்டார். சம்பவ இடத்திற்கு கிரிநகர் போலீசார் விரைந்து வந்தனர். அதற்குள் அந்த இடத்தில் இருந்து, கன்னட இளைஞர்கள் சென்று விட்டனர்.

பெங்களூரில் பிறந்து வளர்ந்த சந்தோஷ் தனது முகநூல் பகுதியில் நடிகர்கள் சிவராஜ்குமார், துனியா விஜய், ராகினி திவேதி, தர்ஷன் ஆகியோர் பற்றி குறிப்பிட்டு இருந்தார். இந்தப் பதிவை பதிவு செய்வதற்கு முன்பே அதுபோன்ற ஒருபதிவை செய்ய வேண்டாம் என்று நண்பர்கள் கேட்டுக் கொண்ட பின்னரும், சந்தோஷ் பதிவு செய்து இருப்பதாக அவரது நண்பர்கள் கருத்து தெரிவித்துள்ளனர்.



கன்னட இளைஞர்கள் சந்தோஷை போலீஸ் நிலையத்திற்கு அழைத்து சென்று வழக்கு பதிவு செய்ய வற்புறுத்தியதாகவும், ஆனால், போலீசார் மறுத்து விட்டதாகவும், சந்தோஷை எச்சரித்து அனுப்பியதாகவும் கூறப்படுகிறது.

இதுகுறித்து போலீஸ் அதிகாரிகள் கூறுகையில், ''சந்தோஷை யாரும் போலீஸ் நிலையத்திற்கு அழைத்து வரவில்லை. சந்தோஷ் புகார் அளித்தால் பதிவு செய்ய தயாராக இருக்கிறோம்'' என்றார்.

முகநூலில் எங்கள் செய்திகளை படிக்க க்ளிக் செய்யவும்


Loading...