News
Loading...

மத்திய பா.ஜ.க. அரசு பொதுத்துறை நிறுவனங்களை முடக்குவது பொருத்தமாகாது!

மத்திய பா.ஜ.க. அரசு பொதுத்துறை நிறுவனங்களை முடக்குவது பொருத்தமாகாது!

கலைஞர் அறிக்கை : 

நட்டத்தில் நடைபெறும் 17 பொதுத் துறை நிறுவனங்களை மூடிவிடுவதற்கான திட்டத்திற்கு பிரதமர் அலுவலகம் ஒப்புதல் அளித்திருப்பதாகச் செய்தி வெளி வந்துள்ளது. அது போலவே 22 பொதுத் துறை நிறுவனங்களில் அரசு பங்கு முதலீட்டினை 51 சதவிகிதத்திற்கும் கீழே குறைத்துக் கொள்ளப் போவதாகவும் அந்தத் திட்டத்திற்கும் பிரதமர் அலுவலகம் பச்சைக் கொடி காட்டி விட்டதாகவும் அந்தச் செய்தியில் கூறப்பட்டுள்ளது. இந்த இரண்டாவது பட்டியலில் தான், சேலம் உருக்காலை இடம் பெற்றுள்ளது. பிரதமர் அலுவலகம், இந்த நிறுவனங்களை முழுவதுமாக அப்படியே விற்பதற்கு இல்லை என்றும், இந்தப் பொதுத் துறை நிறுவனங்களில் அரசுக்குச் சொந்தமான பங்குகளைக் குறைத்துக் கொள்ளப் போவதாகவும் சொல்கிறார்கள். நிறுவனங்களை விற்பது பற்றி நிதித் துறை சார்பில் மத்திய அமைச்சரவையின் ஒப்புதல் கோரியதற்கும், பிரதமர் அலுவலகம் ஏற்பு அளித்துள்ளது. திருச்சி பாரத மிகுமின் நிறுவனத்தின் அரசுப் பங்கு முதலீட்டைக் குறைத்துக் கொள்ளப் போவதாக மத்திய அரசு ஏற்கனவே அறிவித்து விட்டது.

இந்தச் செய்திக்குப் பிறகு, சேலம் உருக்காலையைத் தனியாருக்கு விற்க பிரதமர் அலுவலகம் ஒப்புதல் அளித்திருப்பதை எதிர்த்து, சேலம் உருக்காலைத் தொழிலாளர்கள் ஒன்றிணைந்து வேலை நிறுத்தத்தைத் துவக்கியுள்ளார்கள். கடந்த சில மாதங்களுக்கு முன்பு இதே போன்றதொரு செய்திகள் வெளி வந்த நேரத்தில் 27-7-2016 அன்று நான் ஒரு அறிக்கை வெளியிட்டேன். 

சேலம் இரும்பாலைத் திட்டமும், சேதுக் கால்வாய்த் திட்டமும் நிறைவேற்றப்பட வேண்டுமென பேரறிஞர் அண்ணா அவர்கள் முதலமைச்சராகப் பொறுப்பேற்றபின் 1967 ஜூலை 23 ஆம் நாளில் மத்திய அரசின் கவனத்தை ஈர்க்கும்வகையில் தமிழகம் முழுவதும் ‘எழுச்சிநாள்’ கடைப்பிடிக்கப்பட்டது. அதனைத் தொடர்ந்து அண்ணா அவர்கள் மறைவுக்குப் பின் நான் முதல்வராக இருந்த போது, 21-3-1970 அன்று டெல்லியில் பிரதமர் திருமதி இந்திரா காந்தி அம்மையார் அவர்களின் தலைமையில் நடைபெற்ற தேசிய வளர்ச்சிக் குழுக் கூட்டத்தில் கலந்து கொண்டு சேலம் உருக்காலைத் திட்டத்தைப் பற்றிய அறிவிப்பு இல்லாவிட்டால், ஐந்தாண்டுத் திட்ட வரைவையே தமிழ்நாடு ஏற்றுக் கொள்ளாது என்று திட்டவட்டமாக எடுத்துச் சொன்னேன். அதன் விளைவாகத் தான் 17-4-1970 அன்று நாடாளுமன்றத்தில் பிரதமர் இந்திரா காந்தி தமிழகத்தின் கோரிக்கையை ஏற்று, நான்காம் அய்ந்தாண்டுத் திட்டத்திலேயே சேலம் உருக்கு ஆலை துவக்கப்படும் என்று அறிவித்தார். அதே ஆண்டு செப்டம்பர் 16ஆம் நாள் உருக்கு ஆலைக்கான அடிக்கல் நாட்டு விழா என் தலைமையில் நடைபெற்று, பிரதமர் இந்திரா காந்தி அடிக்கல் நாட்டினார். முதலில் சேலத்தில் உருட்டாலையாகத் தொடங்கப்பட்டு இன்று உலகின் பல்வேறு நாடுகளிலும் புகழ் பெருக்கி நிற்கிறது. இதில் முந்நுhறு அதிகாரிகள், ஆயிரம் நிரந்தரப் பணியாளர்கள், கூட்டுறவு சங்கம் மூலம் பணியாற்றுபவர்கள் முந்நுhற்றி ஐம்பது பேர், ஐநுhறு ஒப்பந்தப் பணியாளர் என இரண்டாயிரத்து ஐநுhறுக்கும் மேற்பட்டோர் பணி புரிந்து வருகின்றனர். மேலும் ஐந்தாயிரத்திற்கும் மேற்பட்டவர்கள், இந்த உருக்காலை மூலம் மறைமுக வேலை வாய்ப்பைப் பெற்றுள்ளார்கள். 

இங்கே கார்பன், மற்றும் சாதாரண ஸ்டீல், சுருள், நாணயவில்லை, ஸ்டெயின்லெஸ் ஸ்டீல் ஆகிய பொருள்கள் உற்பத்தி செய்யப்பட்டு வருகின்றன. ரெயில் பெட்டித் தொழிற்சாலைக்கு மட்டும், ஆண்டுக்கு 30 ஆயிரம் டன் பொருள்கள் அனுப்பி வைக்கப்படுகிறது. இந்த அளவுக்கு வளர்ந்து வரும் சேலம் உருக்காலையைத் தனியார் மயமாக்கும் முயற்சி தொடங்கியிருப்பதாக வெளியாகியிருக்கும் தகவல் அனைவரையும் அதிர்ச்சியடையச் செய்துள்ளது. சேலம் உருக்காலை, தொடக்கம் முதல் லாபகரமாக இயங்கி வருகின்றது. 2003ஆம் ஆண்டு முதல் 2010வரை ஆண்டுக்கு சராசரியாக 100 கோடி ரூபாய் இலாபம் ஈட்டித் தந்துள்ளது. அதற்குப் பிறகு 2 ஆயிரம் கோடி ரூபாய்ச் செலவில் அங்கே ஒரு எஃகு உற்பத்திக் கூடம் அமைத்ததால், உருக்காலையின் கடன் சுமை அதிகமானது. ஆண்டுக்கு 100 கோடி ரூபாய் வரை இலாபத்தில் இயங்கி வந்த உருக்காலை, தற்போது இழப்பில் இயங்குவதாகக் கூறி, தனியாருக்கு தாரை வார்ப்பதற்கான முயற்சி நடைபெறுவதாகச் செய்திகள் வருகின்றன. சேலம் உருக்காலையை தலைமை யிடமாகக் கொண்டு செயல்பட்டு வந்த மத்திய விற்பனை மையம் கொல்கத்தாவிற்கு மாற்றம் செய்யப்பட்டதால், உருக்காலையின் வாடிக்கையாளர்கள் பலர் குறைந்து விட்டார்களாம். இதைக் காரணமாகக் காட்டி, தனியாரிடம் இந்தப் பொதுத் துறை உருக்காலையை ஒப்படைக்கும் நடவடிக்கையில் மத்திய அரசு ஈடுபடாமல், நிர்வாகத் திறமை மிக்க நபர்களை பணியமர்த்த வேண்டும். தனியாக மின் உற்பத்தி நிலையம் அமைக்க நடவடிக்கை எடுக்க வேண்டும். ஒரு யூனிட் மின்சாரம் தயாரிக்க ரூ. 7.70 வரை செலவு ஏற்படும். ஆனால் உருக்காலையில் 4 ரூபாய்க்கு ஒரு யூனிட் உற்பத்தி செய்யலாம். இங்கு 120 மெகாவாட் மின்சாரம் தயாரிக்கும் திட்டம், கிடப்பில் போடப்பட்டுள்ளது. இவற்றை நிறைவேற்றினால், 60 மெகாவாட் மின்சாரம் உருக்காலைக்கும், 60 மெகாவாட் தமிழ்நாடு மின்சார வாரியத்திற்கும் கிடைக்கும். ரெயில் பெட்டி தயாரிக்கும் தொழிற்சாலை ஒன்றை சேலத்தில் தொடங்கலாம். ஆக்கபூர்வமான இந்த முயற்சிகளை மேற்கொள்ளச் சிறிதும் கருதிப் பார்க்காமல், தனியாருக்குத் தாரை வார்த்திட முயற்சி செய்வது தகுந்த தீர்வாகாது.

தி.மு.கழக ஆட்சிக் காலத்தில் பொதுத் துறை நிறுவனங்களைத் தனியாருக்குத் தாரைவார்ப்பதைத் தடுத்து நிறுத்திட முயற்சி மேற்கொள்ளப்பட்டது. எனவே தமிழக அ.தி.மு.க. ஆட்சியினர், தி.மு.க. ஆட்சிக் காலத்தில் மத்திய காங்கிரஸ் அரசால் உருவாக்கப்பட்டதாயிற்றே என்று எண்ணாமல், சேலம் உருக்காலையைத் தனியாருக்குத் தாரை வார்க்கின்ற முயற்சிக்கு முட்டுக் கட்டை போடுவதற்கான நடவடிக்கைகளை உடனடியாகத் தொடங்கிட வேண்டுமென்றும், மத்திய பாஜக அரசும் தமிழகத்தின் நலன் கருதியும், ஆயிரக் கணக்கான தொழிலாளர்களின் வாழ்வாதாரத்தை எண்ணிப் பார்த்தும், இந்தப் பொதுத் துறை நிறுவனத்தின் மீது கை வைக்காமல் இருக்க வேண்டு மென்றும் வலியுறுத்துகிறேன்! 

இந்தியாவின் மிகப் பெரிய பொதுத் துறை நிறுவனமான ரயில்வே நிறுவனத்தின் தனிச் சிறப்பான சேவையையும், பயன்பாட்டையும் கருத்தில் கொண்டு, கடந்த 92 ஆண்டுக் காலமாக தனி நிதி நிலை அறிக்கை என இருந்து வந்ததை மாற்றி, இனி பொது நிதி நிலை அறிக்கையோடு இணைத்துத் தான் என மேற்கொள்ளப்பட்டுள்ள மத்திய பா.ஜ.க. அரசின் முடிவே, ரயில்வேயைத் தனியார் மயமாக்குவதற்கான முதல் கட்டம் என்று விமர்சனம் செய்யப்பட்டு வருகிறது. தற்போது பல்வேறு பொதுத் துறை நிறுவனங்களை ஏதாவதொரு காரணத்தைக் காட்டி, தனியார் மயப்படுத்துவதும் - பங்கு முதலீட்டை வெகுவாகக் குறைத்துக் கொண்டு தனியார் மயத்திற்கானக் கதவுகளைத் திறந்து விடுவதும் எதிர் மறை நடவடிக்கைகளாகும். மத்திய பா.ஜ.க. அரசு, நாட்டின் பொருளாதாரத் துறையில் முதலாளித்துவத்தையும், சிந்தனை தளத்தில் இந்துத்துவாவையும் வெகு வேகமாகப் புகுத்தி நடைமுறைப்படுத்திடத் துடிக்கிறது என்ற எண்ணம் பரவி வருவதை உணர வேண்டும்!

முகநூலில் எங்கள் செய்திகளை படிக்க க்ளிக் செய்யவும்

News2.in mobile app வெறும் 1 எம்பி மட்டுமே! செய்திகளை சுருக்கமாகவும் விரைவாகவும் தெரிந்து கொள்ள உடனே டவுன்லோட் செய்யுங்கள்.