News
Loading...

இந்துவுக்கு இறுதிச்சடங்கு செய்த இஸ்லாமிய இளைஞர்கள்

இந்துவுக்கு இறுதிச்சடங்கு செய்த இஸ்லாமிய இளைஞர்கள்

தானே: மதத்தை தவிர்த்து மனிதநேயத்தை வெளிப்படுத்திய இறுதிச்சடங்கு சம்பவம் மத நல்லிணக்கத்துக்கு மேலும் ஒரு சான்றாக அமைந்துள்ளது.

மும்பாரா அருகே அல்மாஸ் காலனியில் காவலாளியாக நீண்ட நாட்கள் பணியாற்றிய வாமன் காதம் கடந்த ஞாயிற்றுக்கிழமை இரவு உயிரிழந்தார். அவருக்கு இறுதிச் சடங்கு செய்ய உறவினர்களும், மூத்த தார மகன்களும் இரவில் வர மறுத்ததால் அந்த காலனியில் குடியிருக்கும் இஸ்லாமிய இளைஞர்கள் காதமின் உடலை இந்து முறைப்படி தகனம் செய்துள்ளனர்.

காதமின் மனைவி விதவா கேட்டுக் கொண்டதையடுத்து, தங்களது சிறு வயது முதலே நன்கு பழகிய காலனி காவலாளியான காதமுக்கு இறுதிச் சடங்குகள் செய்ய இஸ்லாமிய இளைஞர்கள் 8 பேர் முன் வந்து அனைத்து ஏற்பாடுகளையும் செய்துள்ளனர். கஹில் பவன், ஃபகத் தபீர், நவாஸ் தபீர், ரஹீல் தபீர், ஷாபன் கான், மாக்சூத் கான், ஃபரூக் கான், முகமது காசம் சாய்க் ஆகியோர் முயற்சி செய்து காதமுக்கு மருத்துவரிடம் இருந்து இறப்பு சான்றிதழையும் பெற்றுள்ளனர்.

இந்துவுக்கு இறுதிச்சடங்கு செய்த இஸ்லாமிய இளைஞர்கள்

இது குறித்து காதமின் மனைவி விதவா கூறுகையில், தனது கணவரது இறுதிச்சடங்கு இத்தனை மரியாதையுடன் நடக்கும் என எதிர்ப்பார்க்கவில்லை. இறுதி ஊர்வலத்தில் கலந்துக் கொண்ட 40 இளைஞர்களும் இஸ்லாம் மதத்தைச் சேர்ந்தவர்கள். சிறு குழந்தைகளாக இதுவரை நாங்கள் பார்த்த இவர்கள் தற்போது பொறுப்புள்ள இளைஞர்களாக மாறியுள்ளது பெருமையாக இருப்பதாக கூறியுள்ளார்.

உதவிய இளைஞர்களில் ஒருவரான முகமது காசம் சாய்க் கூறுகையில், ஞாயிற்றுகிழமை இரவு மாலை கல்லீரல் நோயால் பாதிக்கப்பட்ட காதம் மாமாவை மருத்துவமனைக்கு அழைத்துச் சென்றுவிட்டு வீட்டில் வந்து விட்டோம். இரவில் விதவா அத்தையின் அலறல் சத்தம் கேட்டு ஓடி சென்று பார்த்தபோது வாந்தி எடுத்த நிலையில் காதம் உயிரற்று கிடந்தார். இதயைடுத்து அவரது உறவினர்களுக்கு தகவல் தெரிவிக்கப்பட்டுள்ளது. யாரும் முன் வராததால் காதம் மாமாவின் இறுதிச் சடங்கை நாங்களே முடித்தோம் என்றுக் கூறினார்.

இந்து மத புரோகிதரை அழைத்து, இறுதிச்சடங்கிற்கு தேவையான மூங்கில் குச்சிகள், மண்பானை, ஊதுவத்தி, வெள்ளை துணி, தென்னை பாய் உள்ளிட்டவைகளை ஏற்பாடு செய்து, நள்ளிரவு 3 மணிக்கு அருகில் உள்ள இடுகாட்டில் இறுதிச் சடங்கு நடத்தினோம். எங்களில் ஒருவர் காதமின் உடலுக்கு தீமூட்ட முயன்ற போது, மும்பாராவில் இருந்து வந்த காதமின் மகன் யாரிடமும் ஒருவார்த்தைக் கூட பேசாமல், சடலத்துக்கு தீ வைத்துவிட்டு கிளம்பினார். தற்போது ஆதரவற்று நிர்கதியாக இருக்கும் காதமின் மனைவி வித்வாவை நாங்கள் பாத்துக்கொள்ளவிருக்கிறோம் என இளைஞர்கள் கூறியுள்ளனர்.

முகநூலில் எங்கள் செய்திகளை படிக்க க்ளிக் செய்யவும்


Loading...