News
Loading...

தாத்தாக்களிடம் இருந்த கேலி, கிண்டல் பேரன்களிடம் இல்லையா?

தாத்தாக்களிடம் இருந்த கேலி, கிண்டல் பேரன்களிடம் இல்லையா?

தாத்தாக்களிடம் இருந்த நகைச்சுவை உணர்ச்சி பேரன்களிடம் இல்லையோ? அந்தக் கால பெருசுகள் வாயைத் திறந்தால் வெற்றிலைச்சாறுடன் நக்கல் நையாண்டியையும் தெறிக்கவிடுவதைப் பார்த்திருக்கிறோம். இப்போது நகைச்சுவை உணர்ச்சி குறைந்துவிட்டதா? 

சில நாட்களுக்கு முன்னர் டெலிகிராஃப் இணைய தளத்தில் படித்த ஒரு கட்டுரை `உலகம் தன் ஹ்யூமர் சென்ஸை இழந்துகொண்டே இருக்கிறதா?' என்ற கேள்வி எழுப்பியது. `ஒரு கார்ட்டூனைச் சகித்துக்கொள்ள முடியாத சார்லி ஹெப்டே பத்திரிகை அலுவலகத் தாக்குதல் உதாரணம்' என்று அதில் சொல்கிறார் கட்டுரையாசிரியர்.

நகைச்சுவை என்பது, அதிகாரத்துக்கு... அடக்கு முறைகளுக்கு எதிராகக் கேள்விகள் எழுப்பக்கூடியது; மக்களிடம் இணக்கத்தையும் சகிப்புத்தன்மையையும் உருவாக்கக்கூடியது என்பது அறிவியல்பூர்வமான விளக்கம். அந்தப் பயம் இருந்ததினால்தான் ஹிட்லர் 1933-ம் ஆண்டில் `ஜோக்ஸ்'க்குத் தடைவிதித்து ஒரு சட்டம் இயற்றினார். குறிப்பாக, ஹிட்லரின் ராணுவத்தைக் கிண்டல் பண்ணும் ஜோக்குகளை யாராவது சொன்னால், உடனடி ஜெயில். ஆனால் நம் சாப்ளின், ஹிட்லரை `தி கிரேட் டிக்டேட்டர்'-ல் நம் ஊர் மொழியில் சொன்னால் `நல்லா வெச்சுசெய்தார்’.

உண்மையில் அதிகாரமும் ஆட்சியாளர்களும் சீரியஸாக விமர்சிப்பதைவிட கிண்டல் கேலிசெய்வதைச் சகித்துக் கொள்ளாது. அதன் ஆழமும் தாக்கமும் அதிகம். முதல் வரியின் கேள்விக்கு இப்போது வருவோம். தாத்தாக்களிடம் இருந்த கேலி, கிண்டல் பேரன்களிடம் இல்லையா? இருக்கிறது. தாத்தாக்கள், திண்ணைச் சுவரில் சாய்ந்துகொண்டு அதைச் செய்தார்கள். பேரன்கள், ஃபேஸ்புக் சுவரில் அதை ஸ்மைலியும் மீம்ஸும் போட்டுக் கலாய்த்துக்கொண்டிருக்கிறார்கள். டெலிகிராஃப் கட்டுரையாளர் பயப்படுவது வீண். `கடவுளின் பரிசு' என நகைச்சுவையைச் சொல்வார்கள். கடவுளே நக்கல் பிடிச்ச ஆள் எனத் தோன்றுகிறது. பிரபஞ்ச படைப்பில் அவர் செய்த நையாண்டிதான் மனிதன்.

முகநூலில் எங்கள் செய்திகளை படிக்க க்ளிக் செய்யவும்


Loading...