News
Loading...

கர்நாடகா பந்த்; தமிழர்களை தாக்குவோம் என கன்னட அமைப்புகள் மிரட்டல்

கர்நாடகா பந்த் தமிழர்களை தாக்குவோம் என கன்னட அமைப்புகள் மிரட்டல்

கர்நாடகாவில் முழு அடைப்புப் போராட்டத்தில் ஈடுபட்டுள்ள கன்னட அமைப்புகள், தேவை ஏற்படின் தமிழர்களை தாக்கவும் தயங்க மாட்டோம் என மிரட்டல் விடுத்துள்ளனர்.

காவிரியில் இருந்து தமிழகத்திற்கு நீர் திறந்துவிடுவதை கண்டித்து, கன்னட ரக்சன வேதிகே அமைப்பினர் உள்பட ஏராளமான கன்னட அமைப்புகள் முழு அடைப்பு போராட்டம் நடத்திவருகின்றனர். இதனால், கர்நாடகா செல்லும் தமிழக பேருந்துகள், சரக்கு லாரிகள் அனைத்தும் முடங்கியுள்ளன. இதேபோன்று, கர்நாடகாவில் இருந்தும் தமிழகம் உள்பட வெளிமாநிலங்களுக்கான போக்குவரத்து சேவைகள் நிறுத்தப்பட்டுள்ளன.

''கர்நாடகம் நம்மதே - காவேரி நம்மதே'' என்ற கோசங்களுடன் பெங்களூரு மெஜஸ்டிக் ரயில்நிலையம் முன்பாக, கன்னட அமைப்புகள் போராட்டத்தில் ஈடுபட்டனர். அவர்கள் ரயில் மறியல் செய்ய முயற்சிக்கவே, போலீசார் மறுப்பு தெரிவித்தனர். இதையடுத்து, ரயில்நிலையம் முன்பாக, அமர்ந்து முற்றுகைப் போராட்டம் நடத்திவருகின்றனர்.

இதேபோன்று, பெங்களூரு விமான நிலையம் முன்பாக, போராட்டத்தில் ஈடுபட முயன்ற கன்னட ரக்சன வேதிகே அமைப்பைச் சேர்ந்த ஆண், பெண்கள் ஏராளமானோரை போலீசார் கைது செய்து, அப்புறப்படுத்தினர்.

பெல்லாரி, குல்பர்க்கா போன்ற இடங்களில் சாலைகளில் திரண்ட கன்னட அமைப்பினர், தமிழக முதலமைச்சர் ஜெயலலிதாவின் உருவ பொம்மையை எரித்து, கண்டன முழக்கமிட்டனர். போராட்டத்தின்போது, சிலர் தீக்குளிக்கவும் முயன்றதால், பரபரப்பு ஏற்பட்டது. 
அப்போது செய்தியாளர்களிடம் பேசிய கன்னட ரக்சன வேதிகே அமைப்பினர், முழு அடைப்புக்கு ஆதரவு தராவிட்டால், கர்நாடகாவில் வசிக்கும் தமிழர்களை தாக்கவும் தயங்கமாட்டோம் என்று மிரட்டல் விடுத்தனர். இதுதொடர்பாக, அச்சம் தெரிவித்துள்ள கர்நாடகாவாழ் தமிழர்கள், தங்களுக்கு மாநில, மத்திய அரசுகள் உரிய பாதுகாப்பு வழங்க வேண்டும் என்றும் கோரிக்கை விடுத்துள்ளனர்.

முகநூலில் எங்கள் செய்திகளை படிக்க க்ளிக் செய்யவும்


Loading...