News
Loading...

உள்ளாட்சி தேர்தல்: செப்.-16 முதல் அதிமுக விண்ணப்ப விநியோகம்

உள்ளாட்சி தேர்தல்: செப்.-16 முதல் அதிமுக விண்ணப்ப விநியோகம்

சென்னை : உள்ளாட்சி தேர்தலில் அதிமுக சார்பில் போட்டியிட விரும்புவோர் வருகிற 16-ம் தேதி முதல் விண்ணப்பிக்கலாம் என அக்கட்சியின் பொதுச்செயலாளர் ஜெயலலிதா அறிவித்துள்ளார்.

தமிழகத்தில் 12 மாநகராட்சி, 123 நகராட்சி, 529 பேரூராட்சி, 12 ஆயிரத்து 527 ஊராட்சி ஆகிய ஊராட்சி அமைப்புகள் உள்ளன. இந்த அமைப்புகளில் பதவியில் இருப்பவர்களின் 5 ஆண்டுகள் பதவிக்காலம் வருகிற அக்டோபர் மாதத்துடன் முடிவடைகிறது. இதையடுத்து, உள்ளாட்சித் தேர்தலை நடத்துவதற்கான ஏற்பாடுகளை மாநில தேர்தல் ஆணையம் தீவிரமாக செயல்படுத்தி வருகிறது. அதன்படி, அக்டோபர் மாதம் 2-வது வாரம் தேர்தல் நடைபெறும் என தெரிகிறது. கடந்த முறை போல இந்த முறையும் 2 கட்டமாக உள்ளாட்சி தேர்தல் நடத்தப்படலாம் என்றும் கூறப்படுகிறது.

இந்நிலையில், உள்ளாட்சி தேர்தல்களில் அதிமுக சார்பில் போட்டியிட விரும்புவோர் வருகிற 16-ம் தேதி முதல் விண்ணப்பிக்கலாம் என அக்கட்சியின் பொதுச்செயலாளர் ஜெயலலிதா அறிவித்துள்ளார்.

இது தொடர்பாக அவர் வெளியிட்டுள்ள அறிவிப்பில், உள்ளாட்சி தேர்தலில் அதிமுக சார்பில் போட்டியிட விரும்புவோர் வருகிற 16-ம் தேதி முதல் 22-ம் தேதி வரை விண்ணப்பிக்கலாம். சென்னை மாநகராட்சிக்கான விண்ணப்பம் கட்சி தலைமை அலுவலகத்தில் வழங்கப்படும்.

அதேபோல், மற்ற மாவட்டங்களுக்கான விண்ணப்பங்கள் அந்தந்த அதிமுக மாவட்ட அலுவலகங்களில் வழங்கப்படும் என்று கூறப்பட்டுள்ளது.

மாநகராட்சி, நகராட்சிகள் உள்ளிட்ட உள்ளாட்சி அமைப்புகளை கைப்பற்றுவதில் அதிமுக முனைப்புடன் செயல்பட்டு வருகிறது. அதன்படி, முதன்முதலாக விண்ணப்ப விநியோகம் குறித்த அறிவிப்பை அக்கட்சி தலைமை வெளியிட்டுள்ளது.

முன்னதாக, நகராட்சி மற்றும் பேரூராட்சி தலைவர் தேர்வு முறையில் மாற்றம் செய்யும் புதிய சட்டத்திருத்த மசோதா மற்றும் மேயர்களை தேர்ந்தெடுக்கும் சட்ட திருத்த மசோதாக்களை அதிமுக-வினர் சட்டப்பேரவையில் தாக்கல் செய்து நிறைவேற்றினர்.

புதிய மசோதா மூலம் இனிமேல் கவுன்சிலர்கள் மூலம் நகராட்சி மற்றும் பேரூராட்சி தலைவர்கள் தேர்ந்தெடுக்கப்படுவார்கள். அதேபோல் மாமன்ற உறுப்பினர்கள், மறைமுகமாக மேயர்களை தேர்ந்தெடுப்பர்.

முகநூலில் எங்கள் செய்திகளை படிக்க க்ளிக் செய்யவும்


Loading...