News
Loading...

வெளிநாட்டு வேலைக்கு டாட்டா..: நடைப்பாதை பள்ளி நடத்தும் என்ஜினியர்

நடைப்பாதை பள்ளி நடத்தும் என்ஜினியர்

அகமதாபாத்: ஏழை மாணவர்களுக்கு தரமான கல்வி வழங்கும் நோக்குடன் வத்வா பகுதியில் சத்பவ்நகர் போலீஸ் சவுக் இடத்தில் என்ஜினியர் பட்டதாரி ஒருவர் நடைப்பாதை பள்ளி நடத்தி வருகிறார்.

வத்வா, நரோல் ஆகிய பகுதிகளில் பள்ளிக்கு செல்ல முடியாமல் படிப்பை தொடர முடியாமல் உள்ள ஏழை மாணவர்களுக்கு சிறந்த முறையில் கல்வி வழங்க வேண்டும் என்ற நோக்கத்துடன், தனது வெளிநாட்டு வேலையை விட்டுவிட்டு நண்பர்களின் உதவியுடன் விராட் ஷா என்பவர் நடைப்பாதை பள்ளி நடத்தி வருகிறார்.

துபாயில் மாதம் ரூ.3.5 லட்சம் ஊதியம் வாங்கிக் கொண்டிருந்த ஷா(45), அந்தப் பணியை விட்டுவிட்டு சுமார் 200 ஏழை மாணவர்களுக்கு சாலையோரத்தில் கொட்டாய் அமைத்து இலவச கல்வி அளித்து வருகிறார். முறையான முகவரி இல்லாத மாணவர்களுக்கு உள்ளூர் பாதுகாவலராகவும் ஷா பொறுப்பேர்த்துக் கொண்டுள்ளார்.

இது குறித்து ஷா கூறுகையில், 'சிறு வயதிலிருந்தே இயலாதவர்களுக்கு எனது தந்தை உதவிக்கரம் நீட்டுவதில் இருந்து தொடங்கியது இந்த எண்ணம். என் தந்தைக்கு வேலை பறிபோனதும் அனைத்தும் தலைகீழாக மாறியது. எல்டி பொறியியல் கல்லூரி, என்எச்எல் முனிசிபால் கல்லூரிகளில் பயின்று இந்தியாவில் பல்வேறு முன்னணி நிறுவனங்களில் பணிபுரிந்தேன். 

எனது கல்லூரி காலம் முதலே மாணவர்களுக்கு டியூஷன் எடுப்பது வழக்கம். அப்போது எனக்கு இருந்து பணத் தேவை காரணமாக மாணவர்களிடம் பணம்பெற்று கல்வி கற்பித்தேன். இதனிடையே திருப்தி என்பவரை மணந்துக் கொண்டேன்' என ஷா கூறியுள்ளார்.

இதைத் தொடர்ந்து துபாயில் வேலைக் கிடைத்ததும், அங்கு 5 ஆண்டுகள் பணியாற்றிய ஷா போதுமான அளவு பணம் சம்பாதித்து கடந்த 2010 ஆம் ஆண்டு நாடு திரும்பினார். தனது 2 மகள்களின் எதிர்காலத்துக்கும் போதுமான அளவு பணம் சேர்த்து வைத்துள்ளதாக கூறும் ஷா, ஏழை மாணவர்களுக்கு இலவச கல்வி அளிக்கும் தனது கனவை நனவாக்கினார்.

கடந்த 2014 ஆம் ஆண்டு 10 மாணவர்களுடன் தொடங்கிய ஷாவின் நடைப்பாதை பள்ளிகள் 9 ஆக அதிகரித்து, தற்போது 200 மாணவர்கள் படிக்கின்றனர். நகரின் பல்வேறு சேரி பகுதிகளில் வசிக்கும் குழந்தைகளுக்கு இலவச கல்வி, மருத்துவ பரிசோதனை, உணவு வசதி, உள்ளிட்ட அனைத்தையும் தனது நண்பர்களின் உதவியுடன் தரமான முறையில் வழங்கி வருகிறார். 

பள்ளியில் பயிலும் மாணவர்கள் விடுப்பில் செல்ல வேண்டுமெனில் முறையாக அனுமதி பெற வேண்டும் என்பது ஷாவின் பள்ளியில் கட்டாயமான விதிமுறை என கூறப்படுகிறது.

முகநூலில் எங்கள் செய்திகளை படிக்க க்ளிக் செய்யவும்


Loading...