News
Loading...

தமிழகத்திற்கு 20ஆம் தேதி வரை தினமும் 12,000 கன அடி தண்ணீர்: கர்நாடகாவுக்கு மீண்டும் பின்னடைவு

தமிழகத்திற்கு 20ஆம் தேதி வரை தினமும் 12,000 கன அடி தண்ணீர்

தமிழகத்திற்கு காவிரியில் இருந்து தினமும் 12,000 கன அடிவீதம் வரும் 20ஆம் தேதி வரை தண்ணீர் திறக்க வேண்டும் என்று கர்நாடகாவுக்கு உச்சநீதிமன்றம் கறார் உத்தரவு இன்று பிறப்பித்துள்ளது.

முன்பு தினமும் 15,000 கன அடி வீதம் 10 நாட்களுக்கு தண்ணீர் திறக்க வேண்டும் என்று உச்சநீதிமன்றம் கர்நாடகாவுக்கு உத்தரவு பிறப்பித்து இருந்தது. இந்த உத்தரவை எதிர்த்து மறுசீராய்வு மனு ஒன்றை உச்சநீதிமன்றத்தில் கர்நாடகா அரசு தாக்கல் செய்து இருந்தது. இந்த சீராய்வு மனுவை எதிர்த்து தமிழக அரசு உச்சநீதிமன்றத்தில் மனு தாக்கல் செய்தது.

இந்நிலையில் இந்த வழக்கை இன்று விசாரித்த உச்சநீதிமன்ற நீதிபதிகள், ''செப்டம்பர் 20 ஆம் தேதி வரை தினமும் 12,000 கன அடி தண்ணீர் திறக்க வேண்டும்'' என்று இன்று உத்தரவு பிறப்பித்துள்ளது.

முன்பு மொத்தம் 60,000 கன அடியாக இருந்த தண்ணீர் தற்போது நாட்கள் அதிகரிக்கப்பட்டு 96,000 கன அடியாக அதிகரிக்கப்பட்டுள்ளது.

காவிரியில் 10 நாட்களுக்கு 15 ஆயிரம் கன அடி தண்ணீர் திறந்துவிட வேண்டும் என்ற உச்சநீதிமன்றத்தின் உத்தரவையடுத்து, கர்நாடக அரசு காவிரியில் தண்ணீர் திறந்துவிட்டுள்ளது. இதன் காரணமாக கர்நாடகாவில் பெரும் போராட்டங்கள் வெடித்தன. அதன் தொடர்ச்சியாக ரயில் மறியல், கர்நாடக, தமிழக எல்லைப்பகுதிகளில் பேருந்துகள் நிறுத்தம், தமிழர்கள் மீது தாக்குதல் என பல சம்பவங்கள் நடந்து வருகின்றன.

இந்நிலையில், காவிரி விவகாரத்தில், 13 டி.எம்.சி., தண்ணீர் திறந்து விட வேண்டும் என்ற உச்சநீதிமன்றத்தின் உத்தரவை திருத்தம் செய்யக் கோரி கர்நாடக அரசு சார்பில் மேல் முறையீடு செய்யப்பட்டு இருந்தது.

கர்நாடக மாநிலத்தில், குடிநீர் மற்றும் விவசாயத்திற்கு தண்ணீர் விநியோகிக்க முடியாத அசாதாரணமான சூழல் நிலவுவதால், தமிழகத்திற்கு 15 ஆயிரம் கன அடி நீரை 10 நாட்கள் வரை வழங்குவது சாத்தியமில்லை என்று சட்ட அமைச்சர் ஜெயச்சந்திரா கூறி இருந்தார்.

முகநூலில் எங்கள் செய்திகளை படிக்க க்ளிக் செய்யவும்


Loading...