News
Loading...

இஸ்லாமிய குழந்தைகளுக்கு குரான் கற்பிக்கும் இந்து பெண்

இஸ்லாமிய குழந்தைகளுக்கு குரான் கற்பிக்கும் இந்து பெண்

ஆக்ரா: மேற்கு உத்தரபிரதேசத்தில் இனவாதத்தை முறியடிக்கும் செயலாக கோவில் வளாகத்தில் இஸ்லாமிய குழந்தைகளுக்கு இந்துப் பெண் ஒருவர் புனித குரான் நூலை கற்பித்து வருகிறார்.

ஆக்ராவின் சஞ்சய் நகர் காலனி பகுதியில் 12ஆம் வகுப்பு படித்து வரும் இளம்பெண் பூஜா குஷ்வாஹா(18), திறந்தவெளியில் சுமார் 35 இஸ்லாமிய சிறுவர், சிறுமியருக்கு புனி குரான் நூலை கற்பித்து வருகிறார். வேறு மதத்தைச் சேர்ந்த ஒரு பெண் உறுதியுடன், மதிப்புடன், பக்தியுடன் குரான் நூலை தங்களது குழந்தைகளுக்கு கற்பித்து வருவதில் மகிழ்ச்சி என பூஜாவிடம் பயிலும் இஸ்லாமிய குழந்தைகளின் பெற்றோர்கள் கூறுகின்றனர்.

குரான்

சில வருடங்களுக்கு முன்னதாக இதேபகுதியில் இஸ்லாமிய தந்தைக்கும், இந்து தாய்க்கும் பிறந்த சங்கீதா பேகம் என்பவர் எம்மதமும் சம்மதம் எனும் நோக்கில் குழந்தைகளுக்கு குரான் கற்பித்து வந்தார். புனித நூல் மீதான தனது ஆர்வத்தின் அடிப்படையில் அவரிடம் குரான் கற்றேன். மேலும், வகுப்பில் உள்ள அனைவரை காட்டிலும் விரைவாக கற்று சிறந்த மாணவியாக தேர்ந்தேன் என பூஜா கூறியுள்ளார்.

சில சொந்த பிரச்னைகளால் சங்கீதா பேகத்தால் குரான் வகுப்பு நடத்த முடியாமல் போனதையடுத்து, இந்த மரபினைக் கடைப்பிடிக்க வேண்டும் என்று தன்னிடம் கேட்டுக் கொண்டார். மேலும், இஸ்லாத்தில் கூறப்பட்டுள்ள ஒரு முக்கியமான கூற்றை என்னிடம் கூறினார்,' நீங்கள் கற்றுக் கொண்டதை பிறரிடம் பகிராவிட்டால், கற்றதில் பயனில்லை' அதை உணர்ந்து நான் இந்த வகுப்புகளை நடத்தி வருகிறேன் என மிகவும் திடமான பதிலை பூஜா அளித்துள்ளார்.

இந்த வகுப்புகளுக்கு பூஜா பணம் பெறுவதில்லையாம், ஏழை மாணவர்களே பூஜாவிடம் அதிகம் பாடம் கற்பிக்க வருவதாக கூறப்படுகிறது. மாணவர்கள் அதிகம் சேர்ந்ததால் பூஜாவின் வீட்டில் இடநெருக்கடி ஏற்படவே, கோவில் வளகாத்தில் பாடம் நடத்திக் கொள்ள ஊராட்சி அதிகாரிகள் அனுமதி அளித்துள்ளனர்.

பூஜாவின் அக்காவும் ஹிந்தி பாடம், பகவத் கீதையை மாணவர்களுக்கு கற்பித்து வருகிறார். அப்பகுதியில் இஸ்லாமிய மக்கள் அதிகம் வசித்து வருகின்றனர். இது குறித்து இஸ்லாம் மத தலைவரான ஹாஜி ஜமிலுதீன் குரேஷி கூறுகையில், 'ஆசிரியர் இங்கு ஆசிரியரே, அவரது மதம் இங்கு ஒரு பொருட்டாக கருதப்படவில்லை. இந்த செயலால் எங்கள் பகுதி மத நல்லிணக்கத்துக்கு எடுத்துக்காட்டாக அமைந்துள்ளது பெருமையளிக்கிறது' என கூறியுள்ளார். மேலும், இஸ்லாத்தில் அரபு கற்க வேறு மதத்தினருக்கு அனுமதி இல்லை போன்ற கோட்பாடுகள் இல்லை என்றும் கூறியுள்ளார்.

முகநூலில் எங்கள் செய்திகளை படிக்க க்ளிக் செய்யவும்


Loading...