News
Loading...

லஞ்சம் வாங்கிய உதவி ஆய்வாளர், தலைமைக் காவலர் கைது

லஞ்சம் வாங்கிய உதவி ஆய்வாளர், தலைமைக் காவலர் கைது

திருவண்ணாமலை: லஞ்சம் வாங்கிய உதவி ஆய்வாளர், தலைமைக் காவலர் ஆகியோரை ஊழல் தடுப்பு போலீசார் கையும் களவுமாக பிடித்துக் கைது செய்துள்ளனர்.

திருவண்ணாமலை மாவட்டம் பானாம்பட்டு கிராமத்தைச் சேர்ந்தவர் ரமேஷ் (36). கிணறு வெட்டப் பயன்படும் ஜெல்லட்டின் உள்ளிட்ட வெடி மருந்துகளை உரிமம் பெறாமல் எடுத்துச் சென்றதாக, கடந்த 2014-ஆம் ஆண்டில் ரமேஷின் ஓட்டுனர் மற்றும் ஒருவர் மீது கடலாடி காவல் நிலைய போலீஸார் வழக்குப் பதிவு செய்திருந்தனர்.

அதன்பின்னர், ரமேஷ் உரிமம் பெற்று வெடி மருந்துகளை விற்று வருகிறார். இந்நிலையில், சில தினங்களுக்கு முன்பு கடலாடி காவல் நிலைய உதவி ஆய்வாளர் எல்.ஜேசுராஜன் (54), ரமேஷிடம் விசாரணை மேற்கொண்டு, பழைய வழக்குகளை சுட்டிக் காட்டி, பொய் வழக்குகளை போட்டுவிடுவேன் என்று மிரட்டி ரூ.25,000 லஞ்சம் கேட்டுள்ளதாக தெரிகிறது.

தொடர்ந்து, பேரம் பேசி லஞ்சப் பணத்தை ரூ. 10 ஆயிரமாக குறைத்து, அதில், ரூ.7 ஆயிரத்தை லஞ்சமாக ரமேஷ் கொடுத்துள்ளார். மீதி பணம் ரூ.3,000-த்தை தர கோரி தொடர்ந்து ரமேஷிற்கு போலீசார் இருவரும் தொந்திரவு கொடுத்துள்ளனர்.

இதனால் கடுப்பான ரமேஷ், இதுகுறித்து வேலூர் ஊழல் தடுப்புப் பிரிவு போலீஸில் ரமேஷ் புகார் அளித்தார். அதன்பேரில் களத்தில் இறங்கிய ஊழல் தடுப்பு போலீசார், ரமேஷிடம் சாயனம் தடவிய ரூ. 3 ஆயிரத்தை கொடுத்தனுப்பியுள்ளார்கள். அதனை சிறப்புப் பிரிவு தலைமைக் காவலர் ஏழுமலை (45) வாங்கியுள்ளார்.

அந்தப் பணத்தை உதவி ஆய்வாளர் எல்.ஜேசுராஜனிடம் ஏழுமலை கொடுத்துளார். பின்னர், உதவி ஆய்வாளருக்கு ரூ.2,000, தலைமை காவலருக்கு ரூ.1,000 என பங்கு போட்டுள்ளனர். அப்போது, அங்கு மறைந்திருந்த ஊழல் தடுப்புப் பிரிவு போலீஸார், ஜேசுராஜன் மற்றும் ஏழுமலை ஆகியோரை கையும் களவுமாக பிடித்து கைது செய்தனர்.

முகநூலில் எங்கள் செய்திகளை படிக்க க்ளிக் செய்யவும்


Loading...