News
Loading...

வென்றுவருவான் - திரை விமர்சனம்

வென்றுவருவான் - திரை விமர்சனம்

நடிகர்கள் : வீர பாரதி , சமீரா....
இயக்கம் : விஜேந்திரன் .கே
சினிமா வகை : Action

கரு : செய்யாத குற்றங்களுக்காக குற்றவாளியாக கருதப்படும் நிரபராதி நாயகனின் நியாய தர்மமே கரு.

கதை : கதாநாயகர் வீரபாரதியின் அம்மாவுக்கு கண் தெரியாது. நாயகரின் சின்ன வயதில் , அந்த
ஊர் தலைவர் நாயகரின் அம்மா குளிப்பதை மறைந்து நின்று பார்க்கிறார். இதைப் பார்க்கும் நாயகர்வீரபாரதி அவ் ஊர் தலைவரை அடித்துவிடுகிறார். இதை தனது அம்மாவிடம் வந்து கூறுகிறார்வீரபாரதி. ஊர் தலைவரால் மகனின் உயிருக்கு ஆபத்து ஏற்படும் என்பதால், அந்த ஊரில் சாமியாராக திரியும் ஒருவருடன் வீர பாரதியை அருகில் உள்ளகாட்டுக்குள் அனுப்பி வைக்கிறார் அந்த பாசக்காரத் தாய்.

காட்டுக்குள் சென்று வளரும் வீரபாரதி, நாகரீகம் இல்லாமல் முரடனாக வளர்கிறார். இந்நிலையில், ஊர் தலைவரும், அவரது மகனும் சேர்ந்து ஊருக்குள் அட்டகாசம் செய்கிறார்கள். இதனை அறியும் வீரபாரதி அடிக்கடி காட்டுக்குள் இருந்து ஊருக்குள் வந்து அனைவரையும் அடித்து துவம்சம் செய்துவிட்டு, மிரட்டி விட்டும் செல்கிறார்.

வீரபாரதி யாரையெல்லாம் மிரட்டிவிட்டு செல்கிறாரோ ., அவர்கள் எல்லாம் அடுத்தடுத்து மர்மமான முறையில் இறந்து போகிறார்கள். இந்நிலையில், ஊர் மக்கள் எல்லோரும் வீரபாரதிதான்., அவர்கள் அனைவரையும் கொன்றிருப்பான்... என்று எண்ணி, நாயகனை பிடித்து போலீசில் ஒப்படைக்கிறார்கள். உண்மையில், அவர்களையெல்லாம் நாயகன் வீரபாரதிதான் கொலை செய்தாரா? அல்லது அவரது பெயரை குற்றவாளியாக பயன்படுத்தி வேறு யாராவது இந்த கொலைகளை செய்தார்களா? ஜெயிலுக்கு போன வீரபாரதியின் நிலை என்ன..? என்பது உள்ளிட்ட இன்னும் பல கேள்விகளுக்கு வித்தியாசமாகவும் விறு விறுப்பாகவும் விடை சொல்ல முயன்றிருக்கிறது இப்படத்தின் மீதிக்கதை.

கதைநாயகர் : வீரபாரதி முரடன் கதாபாத்திரத்திற்கு கச்சிதமாக பொருந்தியிருக்கிறார். சண்டைக்காட்சிகளில் சிறப்பாக நடித்திருக்கிறார். கதைநாயகி சமீராவும் கிராமத்து பெண்ணாக அழகாக இருக்கிறார். ஜொலிக்கிறார்.

பிற நட்சத்திரங்கள் : ஊர்தலைவராக நடித்திருப்பவர் வில்லத்தனத்தில் மிரட்டியிருக்கிறார். வீரபாரதியின் அம்மாவாக நடித்திருப்பவரும் கண் பார்வையற்றவராக சிறப்பாக நடித்திருக்கிறார். படத்தில் காமெடிக்கு வையாபுரி, கிரேன் மனோகர் இருவரும் வருகிறார்கள். ஆனால், இவர்கள் இருவரும் காமெடி என்ற பெயரில் செய்யும் சேட்டைகளால் சிரிப்பு தான் வரமாட்டேன் என்கிறது .

தொழில்நுட்ப கலைஞர்கள் : முரளி கிருஷ்ணனின் இசையில் பாடல்கள் ரசிக்க தோன்றுகிறது. பின்னணிஇசையில் கொஞ்சம் கவனம் செலுத்தியிருக்கலாம். ஜெயச்சந்திரனின் ஒளிப்பதிவு படத்திற்கு பலவீனமாக இருக்கிறது.

பலம் : 'வென்று வருவான்' எனும் டைட்டில் மட்டுமே.

பலவீனம் : ஜெயச்சந்திரனின் ஓளிப்பதிவில் பெரும்பாலான காட்சிகள் ஆரஞ்சு வண்ணத்தில் இருப்பது படத்தை பலவீனமாக காட்டுகிறது .ஏன் இப்படி.?!

இயக்கம் : படத்தின் இயக்குனர் விஜேந்திரன், கதாபாத்திரங்களை புதுமுகங்களாக தேர்வு செய்திருந்தாலும், அனைவரும் அந்த கதாபாத்திரத்திற்கு கச்சிதமாக பொருந்தியிருக்கிறார்கள். முதல் பாதியில் பெரும்பாலான காட்சிகள் முழுமையடையாமலேயே சென்றிருப்பது சற்று சலிப்பை ஏற்படுத்துகிறது. இருப்பினும், பிற்பாதியில் முன்பாதியில் போடப்பட்ட முடிச்சுகளை அவிழ்க்கும் விதமாக அமைக்கப்பட்ட காட்சிகளில் எல்லாம் விறுவிறுப்பு தொற்றிக் கொள்கிறது. இயக்குனர், முதல்பாதியில் உள்ள காட்சிகளில் மட்டும் கொஞ்சம் கவனம் செலுத்தியிருக்கலாம். முதல்பாதியில் சில காட்சிகளை டிரிம் செய்தால் படம், இன்னும் ., சுவாரஸ்யமாக இருந்திருக்கும்.

பைனல் "பன்ச்'' : மொத்தத்தில்,

''வென்று வருவான்' - நம்பிக்கையுடன் திரைக்கு 'வந்திருக்கிறான்... வெல்வானா ..? பார்க்கலாம்!"

முகநூலில் எங்கள் செய்திகளை படிக்க க்ளிக் செய்யவும்


Loading...