News
Loading...

ஜெ.,வுக்கு சிகிச்சை; புதிய எந்திரம் வாங்கிய அப்போலோ மருத்துவமனை!

ஜெ.,வுக்கு சிகிச்சை; புதிய எந்திரம் வாங்கிய அப்போலோ மருத்துவமனை!

தமிழக முதலமைச்சர் ஜெயலலிதாவுக்கு சிகிச்சை அளிப்பதற்காக, அப்போலோ மருத்துவமனை நிர்வாகம், புதிய எந்திரம் ஒன்றை வாங்கியுள்ளது.

காய்ச்சல் மற்றும் நீர்ச்சத்து குறைபாடு காரணமாக, கடந்த செப்டம்பர் மாதம் 22ம் தேதியன்று முதலமைச்சர் ஜெயலலிதா, சென்னை கிரீம்ஸ் சாலையில் உள்ள அப்போலோ மருத்துவமனையில் அனுமதிக்கப்பட்டார். அவரது உடல்நிலை பற்றி பல்வேறு வதந்திகள் பரவிவந்த நிலையில், அப்போலோ மருத்துவமனை நிர்வாகம், ஜெயலலிதா உடல்நலம் பெற்றுவருவதாக, நாள்தோறும் அறிக்கை வெளியிட்டது.

மேலும், ஜெயலலிதாவுக்கு சிகிச்சை அளிப்பதற்காக, பிரிட்டனில் இருந்து ரிச்சர்டு ஜான் என்ற நுரையீரல் மற்றும் இதர உடல்உறுப்புகளுக்கான சிகிச்சை நிபுணரை அப்போலோ மருத்துவமனை வரவழைத்தது. அவர், அடிக்கடி வருகை தந்து, ஜெயலலிதாவுக்கு சிகிச்சை அளித்தார். இதன்மூலமாக, அவரது உடல்நிலை தேறிவருவதாக, அப்போலோ நிர்வாகம் தெரிவித்தது.

தமிழகத்தின் கூடுதல் ஆளுநர் வித்யாசாகர் ராவ், திமுக எதிர்க்கட்சித் தலைவர் மு.க.,ஸ்டாலின், காங்கிரஸ் துணைத் தலைவர் ராகுல் காந்தி, நிதியமைச்சர் அருண் ஜேட்லி, பாஜக., தலைவர் அமித் ஷா உள்பட பல்வேறு அரசியல் கட்சித் தலைவர்களும் அப்போலோ மருத்துவமனைக்கு நேரில் சென்று, நலம் விசாரித்தனர். ஜெயலலிதா நலம்பெற வேண்டி, அதிமுக., தலைவர்கள், தொண்டர்கள் நாள்தோறும், பல்வேறு விதமான வழிபாடுகளை நடத்தியும் வருகின்றனர்.

தற்சமயம், தீவிர சிகிச்சைப் பிரிவில் அனுமதிக்கப்பட்டுள்ள ஜெயலலிதாவுக்கு சில பிசியோதெரபி பயிற்சிகள் அளிக்கப்பட்டு வருவதாக அப்பல்லோ மருத்துவமனை கூறிவருகிறது. எனினும், இந்த பயிற்சிகளை முழுமையாக அளிக்க முடியவில்லை எனக் கூறப்படுகிறது.

டாக்டர்கள் அடிக்கடி சென்று பயிற்சிகள் அளித்தால், நோய்த்தொற்று அதிகரிக்கக் கூடிய சூழல் உள்ளது. எனவே முதலமைச்சர் ஜெ.,வுக்கு சிறந்த முறையில் பிசியோதெரபி பயிற்சிகள் அளிப்பதற்காக, அப்போலோ நிர்வாகம் ஒரு புதிய எந்திரத்தை வாங்கியுள்ளது.

இதன்மூலம், மனிதர்கள் உதவி இல்லாமல் அவருக்கு சிகிச்சை அளிக்க முடியும். இந்த எந்திரத்தை இயக்குவதற்கு ஒரே ஒரு டாக்டர் மட்டுமே போதும். ஆனால், அதனை இயக்கும் முறை எப்படி எனத் தெரியாமல், அப்போலோ மருத்துவர்களிடையே குழப்பம் ஏற்பட்டது. இதுபற்றி பயிற்சி அளிப்பதற்காக, சிங்கப்பூரில் இருந்து சிறப்பு மருத்துவர்கள் குழு ஒன்று, சென்னை வந்துள்ளது.

சிங்கப்பூர் டாக்டர்கள் குழுவை, குறிப்பிட்ட எந்திரத்தை தயாரித்த நிறுவனமே, அனுப்பி வைத்துள்ளதாகவும் தகவல் கூறப்படுகிறது. இவர்கள், அப்போலோ மருத்துவர்களுக்குத் தேவையான பயிற்சி வழங்கியுள்ளதாகவும், இதன் அடிப்படையில், முதலமைச்சர் ஜெயலலிதாவுக்கு சீரிய சிகிச்சைகள் தொடர்ந்து அளிக்கப்பட்டு வருவதாகவும் அப்போலோ மருத்துவமனை வட்டாரங்கள் தெரிவிக்கின்றன.

முகநூலில் எங்கள் செய்திகளை படிக்க க்ளிக் செய்யவும்

News2.in mobile app வெறும் 1 எம்பி மட்டுமே! செய்திகளை சுருக்கமாகவும் விரைவாகவும் தெரிந்து கொள்ள உடனே டவுன்லோட் செய்யுங்கள்.