News
Loading...

எனது அத்தையைப் பார்க்க அனுமதிக்கவில்லை: ஜெயலலிதா அண்ணன் மகள் குற்றச்சாட்டு

எனது அத்தையைப் பார்க்க அனுமதிக்கவில்லை: ஜெயலலிதா அண்ணன் மகள் குற்றச்சாட்டு

''மருத்துவமனையில் சிகிச்சை பெற்று வரும் முதல்வரும், எனது அத்தையுமான ஜெயலலிதாவை சந்திக்க அனுமதிக்கவில்லை. மருத்துவமனையின் நுழைவு வாயில் காத்திருந்து திரும்பிவிட்டேன்'' என்று ஜெயலலிதாவின் சொந்த அண்ணன் ஜெயகுமாரின் மகள் தீபா குற்றம்சாட்டியுள்ளார்.

சென்னை டைம்ஸ் ஆப் இந்தியாவின் செய்தியாளர் ஜூலி மாரியப்பனுக்கு அளித்த பேட்டியில் தீபா கூறியதாவது:

என் மீது எனது அத்தைக்கு அளவு கடந்த பாசம் உள்ளது. அவரது கையைப் பிடித்து உங்களுக்கு ஒன்றும் ஆகாது. நீங்கள் விரைவில் குணமடைந்து விடுவீர்கள் என்று கூற ஆதங்கமாக உள்ளது. ஆனால், என்னைப் பார்க்க அனுமதிக்கவில்லை.

எனது அத்தைக்கு உடல் நலம் பாதிக்கப்பட்ட விஷயத்தை நான் பத்திரிகை வாயிலாகத்தான் தெரிந்து கொண்டேன். தெரிந்த பின்னர் தினமும் தொடர்ந்து மூன்று நாட்கள் மருத்துவமனை வாயிலுக்கு சென்று நின்று கொண்டு இருந்தேன். அனுமதி கேட்டேன். ஆனால், அத்தையைப் பார்க்க என்னை அனுமதிக்கவில்லை. அங்கு இருந்தவர்களும் நான் எதோ அரசியல்வாதியின் சொந்தம் என்று நினைத்துக் கொண்டனர். என்னை உள்ளே விட்டால்தான் நான் இந்த இடத்தை விட்டுப் போவேன். இல்லையென்றால் போகமாட்டேன் என்று கூறி நின்று கொண்டு இருந்தேன். அப்படி கூறியும், என்னை அனுமதிக்கவில்லை. என்னை உயர் அதிகாரிகள் தொடர்பு கொள்வார்கள் என்று கூறினார்கள். ஆனால், இதுவரை யாரும் என்னை அழைக்கவில்லை.

சிலர் எனது அத்தையை எங்களது சொந்த பந்தத்தில் இருந்து விலக்கி வைத்து விட்டனர். கடந்த 2012ஆம் ஆண்டில் எனது அம்மா விஜயலட்சுமி உடல் நலம் பாதிக்கப்பட்டு இருந்தபோது, என்னால் எனது அத்தையை தொடர்பு கொள்ள முடியவில்லை.

எங்களுடைய அப்பா கடந்த 1995ஆம் ஆண்டில் இறந்தபோது எனது அத்தை எங்களது வீட்டுக்கு வந்து இருந்தார். உடல் நலம் பாதிக்கப்பட்டு இரண்டு வாரங்களாகியும் அவருக்கு என்ன நடந்தது என்று இதுவரை யாருக்கும் தெரியவில்லை. இது மிகவும் மோசமான சூழ்நிலை. இதுகுறித்து விசாரணை மேற்கொள்ள வேண்டும். யார் இந்த ரகசியத்துக்கு பின்னணியில் உள்ளனர் என்பதை கண்டறிய வேண்டும் '' என்கிறார் ஆதங்கத்துடன்.

ஆங்கில இலக்கியம் மற்றும் இதழியல் படித்துள்ள தீபா சென்னை தி. நகரில் வசித்து வருகிறார். இவரது சகோதரர் தீபக் எம்.பி.ஏ., முடித்துவிட்டு ரியல் எஸ்டேட் தொழில் செய்து வருகிறார்.

ஜெயலலிதா உடல் நலம் பாதிக்கப்பட்டு இரண்டு வாரங்களாகியும் இன்னும் ரத்த சம்பந்தப்பட்ட சொந்தங்கள் யாரும் அவரை பார்க்கவில்லை என்பது குறிப்பிடத்தக்கது.

முகநூலில் எங்கள் செய்திகளை படிக்க க்ளிக் செய்யவும்


Loading...