News
Loading...

ஃபிடல் காஸ்ட்ரோ மறைவு: கருணாநிதி உள்ளிட்ட தமிழக தலைவர்கள் இரங்கல்

fidel-castro

கியூப கம்யூனிச புரட்சியாளர் ஃபிடல் காஸ்ட்ரோவின் மறைவுக்கு திமுக தலைவர் கருணாநிதி உள்பட தமிழக அரசியல் தலைவர்கள் பலரும் இரங்கல் தெரிவித்துள்ளனர்.

இதுதொடர்பாக, திமுக தலைவர் கருணாநிதி விடுத்துள்ள அறிக்கையில், ‘’ பாடிஸ்டா என்ற சர்வாதிகாரியை தோற்கடித்து, வெற்றி வாகை சூடியவர் காஸ்ட்ரோ. அமெரிக்கா எனும் யானையின் காலடியில் மிதிபடாமல், ஒரு அங்குசமாகக் கம்யூனிச பாதையில் கியூபாவை வளர்த்தெடுத்த தலைவன் காஸ்ட்ரோ. என் மூச்சோடு கலந்தவர். அவரது மறைவால் வாடும் கியூப மக்களும், உலகம் முழுவதும் உள்ள அவரது அபிமானிகளுக்கு ஆழ்ந்த இரங்கல்,’’ எனக் கூறியுள்ளார்.

இதேபோன்று, மதிமுக பொதுச் செயலாளர் வைகோ கூறுகையில், உலகத்தையே அச்சுறுத்திய அமெரிக்காவை, பல ஆண்டுகளாக அச்சுறுத்தி வந்த மாபெரும் தலைவர் காஸ்ட்ரோவுக்கு வீரவணக்கம்,’’ எனக் குறிப்பிட்டார்.

பாமக நிறுவனர் ராமதாஸ் வெளியிட்ட இரங்கல் செய்தியில், துணிச்சலான, பாட்டாளி வர்க்கப் புரட்சியாளர் காஸ்ட்ரோவின் மறைவால் அதிர்ச்சியடைந்தேன். அவரை இழந்து வாடும், கியூப மக்களுக்கும், உலகப் பொதுவுடைமைவாதிகளுக்கும் இரங்கலைத் தெரிவித்துக் கொள்கிறேன்,’’ எனக் கூறியுள்ளார்.

விடுதலை சிறுத்தைகள் தலைவர் தொல்.திருமாவளவன் வெளியிட்டுள்ள அறிக்கையில், ‘’கம்யூனிச சிந்தனையால் ஒரு சிறிய நாட்டைக்கூட வெற்றிகரமான வளர்ச்சிப் பாதையில் வழிநடத்த முடியும் என நிரூபித்தவர் காஸ்ட்ரோ,’’ என்று குறிப்பிட்டுள்ளார்.

மார்க்சிஸ்ட் கம்யூனிஸ்ட் கட்சியின் தமிழக செயலாளர் ஜி.ராமகிருஷ்ணன் வெளியிட்டுள்ள இரங்கல் செய்தியில், ‘’ஒரு மாபெரும் கம்யூனிச தலைவர் காஸ்ட்ரோ,’’ எனப் புகழாரம் சூடியுள்ளார்.

நாம் தமிழர் கட்சியின் ஒருங்கிணைப்பாளர் சீமான் கூறுகையில்,’’ஃபிடல் காஸ்ட்ரோ உலகம் முழுவதும் உள்ள தேசிய இனங்களுக்கும், தேசிய போராட்ட இயக்கத்தினருக்கும் ஒரு முன்னத்தி ஏராக திகழ்கிறார்,’’ எனத் தெரிவித்தார்.

இந்திய கம்யூனிஸ்ட் கட்சியின் மாநில செயலாளர் முத்தரசன், தா. பாண்டியன் உள்ளிட்டோரும் காஸ்ட்ரோ மறைவுக்கு இரங்கல் தெரிவித்துள்ளனர்.

English Summary : Fidel castro demise tn leaders including karunanidhi conveys grief

முகநூலில் எங்கள் செய்திகளை படிக்க க்ளிக் செய்யவும்


Loading...