News
Loading...

ஊழியர்களுக்கு ரூ.3,000 முன்பணம் நாளை வழங்கப்படும்: போக்குவரத்துத் துறை

ஊழியர்களுக்கு ரூ.3,000 முன்பணம் நாளை வழங்கப்படும்: போக்குவரத்துத் துறை

சென்னை: ஊழியர்களுக்கு ரூ.3,000 முன்பணம் நாளை வழங்கப்படும் என போக்குவரத்துத்துறை அறிவித்துள்ளது.

கருப்புப் பணம் மற்றும் கள்ள நோட்டுகளை ஒழிக்கும் நடவடிக்கை என, ரூ.500, 1000 நோட்டுகள் செல்லாது #DeMonetisation என மத்திய அரசு, கடந்த 8-ம் தேதியன்று திடீரென அதிரடியாக அறிவித்தது. மாற்று வழிகளை மத்திய அரசு அறிவித்திருந்தாலும், சில்லறை தட்டுப்பாடு, ஏடிஎம்-களில் போதிய பணம் இல்லாத சூழல், வங்கிகளில் நீண்ட வரிசை, அத்தியாவசிய பொருட்களை வாங்க முடியாத நிலை என்பன உள்ளிட்ட பல்வேறு காரணங்களால் பொதுமக்கள் மிகுந்த சிரமத்துக்கு ஆளாகியுள்ளனர்.

இதனிடையே, அரசு ஊழியர்கள், போக்குவரத்துக் கழக ஊழியர்கள் பணிச்சுமைக்கு நடுவே பணம் எடுப்பதில் சிரமம் இருப்பதாக தெரிவித்தனர். மேலும், நவம்பர் மாத ஊதியத்தை ரொக்கமாக வழங்க வேண்டும் என்றும் கோரிக்கை விடுத்தனர். இதைத்தொடர்ந்து, தமிழ்நாடு அரசுப் போக்குவரத்துக் கழகத்தில் பணியாற்றும் நடத்துநர்கள், ஓட்டுநர்கள், தொழில்நுட்பப் பணியாளர்கள் உள்ளிட்டோருக்கு நவம்பர் மாத ஊதியத்தில் ரூ.3 ஆயிரம் மட்டும் ரொக்கமாக வழங்க முடிவு செய்யப்பட்டது.

அதன்படி, ஊழியர்களின் சம்பளப் பணத்தில் இருந்து ரூ.3,000 முன்பணம் நாளை வழங்கப்படும். மீதித் தொகை வழக்கம் போல், வங்கிக்கணக்கில் வரவு வைக்கப்படும் என போக்குவரத்துத்துறை அறிவித்துள்ளது. மேலும், இதன் மூலம் சுமார் 1.40 லட்சம் ஊழியர்கள் பயன்பெறுவார்கள் என்றும், 8 போக்குவரத்து கழகங்களில் பணிபுரியும் ஊழியர்களுக்கு அவர்கள் பணியாற்றும் பணிமனைகளில் முன்பணம் வழங்கப்படும் என்றும் அறிவிக்கப்பட்டுள்ளது.

English Summary : Transport employees can get Rs.3,000 cash by tomorrow

முகநூலில் எங்கள் செய்திகளை படிக்க க்ளிக் செய்யவும்


Loading...