News
Loading...

முதல்வர் பன்னீர் செல்வத்துடன் நடிகர் விவேக் சந்திப்பு

முதல்வர் பன்னீர் செல்வத்துடன் நடிகர் விவேக் சந்திப்பு

சென்னை: தமிழக முதல்வர் ஓ.பன்னீர்செல்வத்தை நடிகர் விவேக் திடீரென நேரில் சந்தித்துப் பேசியுள்ளார்.

'வர்தா' புயல் காரணமாக சென்னையில் ஏராளமான மரங்கள் வேரோடு சாய்ந்ததற்கு மாறாக சில நடவடிக்கைகள் எடுக்கக் கோரி நடிகர் விவேக் தமிழக முதல்வர் பன்னீர்செல்வத்தை தலைமை செயலகத்தில் சந்தித்துப் பேசியுள்ளார்.

இந்த சந்திப்பிற்கு பிறகு செய்தியார்களிடம் பேசிய விவேக், 'வர்தா புயலால் சென்னையில் பல ஆயிரம் மரங்கள் முறிந்தும், சரிந்தும் போயுள்ளன. மரங்களை மக்கள்தான் காப்பாற்ற வேண்டும். வெளிநாட்டு மரங்கள் நமது மண்ணுக்கு பொருந்தாதவை. எனவே, நமது மண்ணுக்கு ஏற்ப, மா, பலா, அரச மரங்களை அதிகம் நட வேண்டும் என்று கூறியுள்ளார்.

மேலும், இந்த புயலுக்கு வெளிநாட்டு வகையான, வாகை மரமும், ஆலமரமும் தாக்குப் பிடிக்கவில்லை என்பது தெரிந்துவிட்டது. ஆகையால் ஆந்திராவின் ராஜமுந்திரியிலிருந்து மரங்களை பெயர்த்து எடுத்து வந்து, சென்னையில் நடவு செய்ய வேண்டும் என்று, முதல்வரிடம் கோரிக்கை வைத்துள்ளதாக கூறினார்.

வர்தா புயலில் மரங்கள் சாய்ந்தது குறித்து நடிகர் விவேக் ஏற்கனவே தனது டுவிட்டர் பக்கத்தில் பகிர்ந்திருந்தார். அதில், மரங்களை நடுவது குறித்து அரசுடன் பேசவிருப்பதாகவும் குறிப்பிட்டிருந்தார்.

மறைந்த முன்னாள் குடியரசுத் தலைவர் அப்துல் கலாமின் அறிவுறுத்தலின் பேரில், மாணவர்களுடன் இணைந்து தமிழகம் முழுவதும் 1 கோடி மரக்கன்றுகளை நடும் பணிகளில் நடிகர் விவேக் தீவிரமாக ஈடுபட்டு வருகிறார். கிரீன் கலாம் மரம் நடும் திட்டம் என்ற பெயரில் 2010ஆம் ஆண்டில் இருந்து 1 கோடி மரக்கன்றுகளை நடுவதற்கு விவேக் இலக்கு நிர்ணயித்துள்ளார்.

முகநூலில் எங்கள் செய்திகளை படிக்க க்ளிக் செய்யவும்