News
Loading...

சேலத்தில் ஜெ.தீபா பேரவை தொடங்கிய அதிமுக நிர்வாகிகள்

சேலத்தில் ‘ஜெ.தீபா’ பேரவை தொடங்கிய அதிமுக நிர்வாகிகள்

’ஜெ.தீபா’ பேரவையை சேலத்தை சேர்ந்த அதிமுக நிர்வாகிகள் தொடங்கியுள்ளனர்.

தமிழக முதலமைச்சராக இருந்த ஜெயலலிதா, கடந்த 5ஆம் தேதி உடல்நலக்குறைவு காரணமாக காலமானார். இதையடுத்து புதிய முதலமைச்சராக ஓ.பன்னீர்செல்வம் பதவியேற்றார். ஆனால் பொதுச் செயலாளர் பதவி காலியாக இருந்தது. இந்த பொறுப்பை ஜெயலலிதாவின் நெருங்கிய தோழியான சசிகலாவை ஏற்க வலியுறுத்தப்பட்டது. மேலும் கட்சியின் மூத்த அமைச்சர்கள் முதல் எம்.எல்.ஏக்கள், எம்.பிக்கள் வரை தொடர்ந்து வலியுறுத்தி வருகின்றனர்.

இந்நிலையில் மறைந்த ஜெயலலிதாவின் அண்ணன் மகளான தீபா, தான் மட்டுமே உண்மையான வாரிசு என்று முன்மொழியத் தொடங்கினார். இதுதொடர்பாக செய்தியாளர்களிடம் பேசிய அவர், ஜெயலலிதாவின் அரசியல் வாரிசு தான் மட்டுமே என்று கூறினார். இதனால் அதிமுக பொதுச் செயலாளராக தனக்கு மட்டுமே தகுதி உள்ளது என்றும், சசிகலாவை ஏற்றுக் கொள்ள முடியாது என்று குற்றம்சாட்டினார். அரசியலில் நுழைந்து ஜெயலலிதாவின் பெயரை காப்பாற்றுவேன் என்று குறிப்பிட்டார்.

இதற்கிடையில் சேலம் 44வது வார்டைச் சேர்ந்த அதிமுக நிர்வாகிகள் ஜெ.தீபா பேரவை ஒன்றை தொடங்கியுள்ளனர். இதில் சேலத்தைச் சேர்ந்த 60 வார்டுகளில் உள்ள அதிமுகவினரை இணைக்கத் திட்டமிட்டுள்ளதாக கூறினர். ஜெயலலிதா அண்ணன் மகள் தீபாவை, அதிமுகவிற்கு தலைமை ஏற்க அழைப்பு விடுத்துள்ளதாகவும் குறிப்பிட்டனர்.

முகநூலில் எங்கள் செய்திகளை படிக்க க்ளிக் செய்யவும்