News
Loading...

SBI ஏடிஎம்-ல் புதிய ரூ.2000 கள்ள நோட்டு? பிகாரில் பரபரப்பு

ஏடிஎம்-ல் புதிய ரூ.2000 கள்ள நோட்டு? பிகாரில் பரபரப்பு

பாட்னா: ரூபாய் நோட்டுகள் விவகாரத்தில் எழுந்துள்ள ஆரவாரக் கூச்சலுக்கு மத்தியில் பிகார் மாநில ஏடிஎம் ஒன்றில் புதிய ரூ.2000 கள்ள நோட்டு வந்துள்ளதாக ஒருவர் புகார் அளித்துள்ள சம்பவம் அதிர்ச்சியை ஏற்படுத்தியுள்ளது.

கருப்புப் பணம் மற்றும் கள்ள நோட்டுகளை ஒழிக்கும் நடவடிக்கை என, ரூ.500, 1000 நோட்டுகள் செல்லாது #DeMonetisation என மத்திய அரசு, கடந்த மாதம் 8-ம் தேதியன்று திடீரென அதிரடியாக அறிவித்தது. மாற்று வழிகளை மத்திய அரசு அறிவித்திருந்தாலும், சில்லறை தட்டுப்பாடு, ஏடிஎம்-களில் போதிய பணம் இல்லாத சூழல், வங்கிகளில் நீண்ட வரிசை, அத்தியாவசிய பொருட்களை வாங்க முடியாத நிலை என்பன உள்ளிட்ட பல்வேறு காரணங்களால் பொதுமக்கள் மிகுந்த சிரமத்துக்கு ஆளாகியுள்ளனர்.

ரூபாய் நோட்டுகள் விவகாரத்தை நாடாளுமன்றத்தில் எழுப்பியுள்ள எதிர்கட்சிகள் இரு அவைகளையும் செயல்பட விடாமல் முடக்கியுள்ளன. இந்நிலையில், பிகார் மாநில ஏடிஎம் ஒன்றில் புதிய ரூ.2000 கள்ள நோட்டு வந்துள்ளதாக ஒருவர் புகார் அளித்துள்ள சம்பவம் அதிர்ச்சியை ஏற்படுத்தியுள்ளது.

பிகார் மாநிலம் சீதாமார்ஹி மாவட்டத்தில் உள்ள எஸ்பிஐ ஏடிஎம் ஒன்றில் ரூ.2000 எடுத்ததாகவும், அதனை மாற்ற முயன்ற போது அதனை கள்ள நோட்டு என்று கூறி தன்னிடம் அதனை மாற்ற மறுத்ததாகவும் பங்கஜ் குமார் (42) என்ற அம்மாநில விவசாயி, காவல் நிலையத்தில் புகார் அளித்துள்ளார். அவரது புகாரின் பேரில் வழக்கு பதிவு செய்துள்ள போலீசார், இச்சம்பவம் குறித்து விசாரணை மேற்கொண்டு வருகின்றனர்.

அதேபோல், அந்த எஸ்பிஐ வங்கி கிளையிலும் பங்கஜ் குமார் புகார் அளித்துள்ளார். இதுகுறித்து எஸ்பிஐ வங்கி சீதாமார்ஹி மாவட்ட தலைமை கிளையின் மூத்த மேலாளர் கூறியதாவது: பங்கஜ் குமார் பணம் எடுத்த ஏடிஎம்-ல், பணம் நிரப்பும் பணி தனியார் நிறுவனம் ஒன்றுக்கு வழங்கப்பட்டுள்ளது.

அந்த நிறுவனத்தின் அதிகாரிகள் முன்னிலையில் அங்கு நிரப்பப்பட்டுள்ள பணம் குறித்து சோதனை மேற்கொள்ளப்பட்டு வருகிறது. அதுவரை அந்த ஏடிஎம் மையத்திற்கு சீல் வைக்கப்பட்டுள்ளது. பங்கஜிடம் கள்ள நோட்டை கொடுத்து விட்டு, உண்மையான நோட்டுகளை யாரேனும் மாற்றி அவரை ஏமாற்றியிருக்கவும் வாய்ப்புள்ளது. எனினும், அவரது புகார் ஏற்கப்பட்டு அது குறித்து விசாரணை மேற்கொள்ளப்பட்டு வருகிறது என்றார்.

முகநூலில் எங்கள் செய்திகளை படிக்க க்ளிக் செய்யவும்