News
Loading...

போலி கணக்குகள் மூலம் வெள்ளையாக மாறிய ரூ.100 கோடி! ஆக்சிஸ் வங்கியில் நடந்தது என்ன?

போலி கணக்குகள் மூலம் வெள்ளையாக மாறிய ரூ.100 கோடி! ஆக்சிஸ் வங்கியில் நடந்தது என்ன?

மோடி தலைமையிலான மத்திய அரசின் ‘செல்லாக்காசு’ அறிவிப்பைத் தொடர்ந்து, கறுப்புப் பணத்தை மாற்றுவதற்கு வங்கிகள் உதவியதாகக்  குற்றச்சாட்டுகள் எழுந்த நிலையில், இதே குற்றச்சாட்டில் ஆக்சிஸ் வங்கி வசமாக சிக்கிக்கொண்டிருக்கிறது.

500, 1000 ரூபாய் நோட்டுகள் செல்லாது என அறிவிக்கப்பட்ட சில வாரங்களில், வருமான வரித் துறையினர் இந்தியாவின் பல இடங்களில் அதிரடி சோதனைகளை நடத்த ஆரம்பித்தனர். இதில், பல கோடி மதிப்பிலான புதிய 2000 ரூபாய் நோட்டுகள் சிக்கின. பழைய பணத்தை மாற்றுவதிலும், டெபாசிட் செய்வதிலும் அரசு கடுமையான கட்டுப்பாடுகள் விதித்தபோதிலும், கறுப்புப் பண முதலைகளுக்கு ஆதரவாக செயல்பட்ட வங்கியாளர்கள் வருமான வரித்துறையினரால் கண்டுபிடிக்கப்பட்டனர். 

இந்தியாவில் உள்ள பல வங்கிகளில்  மோசடிகள் நடந்துள்ளன. அவற்றில் ஆக்சிஸ் வங்கி பெரும் சர்ச்சையில் சிக்கியது. டெல்லியில் உள்ள சாந்தினி சவுக் ஆக்சிஸ் வங்கி கிளையில் ரிசர்வ் வங்கியின் விதிமுறைகளை மீறி பணப் பரிமாற்றம் நடைபெறுவதாக புகார் எழுந்தது. புகாரின் பேரில் வருமான வரித் துறையினர் அந்தக் கிளையை சோதனையிட்டனர். அப்போது 44 போலிக் கணக்குகளைப் பயன்படுத்தி ரூ.100 கோடிக்கு பணம் மாற்றித் தரப்பட்டது கண்டுபிடிக்கப்பட்டது. மேலும் அந்த ஒரு வங்கிக் கிளையில் மட்டுமே ரூ.450 கோடிக்கு பணப்பரிமாற்றம் செய்து தரப்பட்டுள்ளது. இந்த மோசடியில் சம்பந்தப்பட்ட இரண்டு வங்கிக் கிளை மேனேஜர்களையும் கைது செய்து விசாரித்து வருகின்றனர். 

ரூ.100 கோடி கறுப்புப் பணத்தை போலி கணக்குகள் மூலம் பரிமாற்றம் செய்துள்ளதாக எழுந்த செய்தியால் ஆக்சிஸ் வங்கி மீதான நம்பகத்தன்மையில் சந்தேகம் எழுந்துள்ளது. இந்தச் சூழ்நிலையில் ஆக்சிஸ் வங்கியின் உரிமத்தை ரத்து செய்யப் போவதாக ரிசர்வ் வங்கி முடிவெடுத்துள்ளது என்ற செய்தி பரவத் தொடங்கியது. ஆனால், பின்னர் அந்தத் தகவல் தவறாகப் பரப்பப்பட்ட வதந்தி என்று தெரிய வந்தது. ஆக்சிஸ் வங்கியின் நிர்வாக இயக்குநர் ராஜேஷ் தகியா தாங்கள் ரிசர்வ் வங்கியின் விதிகளுக்கு உட்பட்டே செயல்படுகிறோம் என்றும், ஆக்சிஸ் வங்கியின் உரிமம் ரத்து செய்யப்படுவதாக பரவிய செய்தி முற்றிலும் பொய்யானது என்றும் கூறினார். அது வதந்திதான் என்பதை ரிசர்வ் வங்கியும் உறுதி செய்தது.

 நாட்டின் மூன்றாவது பெரிய தனியார் வங்கி என்று பெயர் பெற்றது ஆக்சிஸ் வங்கி. இதுவரை ரூபாய் நோட்டு பரிமாற்றத்தில் முறைகேட்டில் ஈடுபட்டதற்காக ஆக்சிஸ் வங்கி நாடு முழுவதும் 30 ஊழியர்களை இடைநீக்கம் செய்திருக்கிறது. இந்த வதந்தி செய்தியால் ஆக்சிஸ் வங்கியின் பங்குகள் 2.5 சதவிகிதம் சரிந்தன. 

 அந்த வங்கியின் தலைமை செயல் அதிகாரி மற்றும் மேலாண்மை இயக்குநரான ஷிகா ஷர்மா, “இந்தியா முழுவதும் 30,00 கிளைகள் உள்ளன. 

50 ஆயிரம் ஊழியர்கள் பணிபுரிகிறார்கள். 80 லட்சம் வாடிக்கையாளர்கள் இருக்கிறார்கள். ஆக்சிஸ் வங்கி நிர்வாகம் ரிசர்வ் வங்கியின் விதிமுறைகளின்படிதான் செயல்படுகிறது. அதேசமயம் எங்களுடைய ஊழியர்களில் சிலர் முறைகேடுகளில் ஈடுபட்டுள்ளார்கள் என்பதை மறுக்கவில்லை. இவர்கள் செய்த தவறு தனிநபர் ஒழுக்க தவறுதலே தவிர, நிர்வாகமே தவறாக செயல்படுகிறது என்று அர்த்தமல்ல. முறைகேடு செய்தவர்கள் யாராக இருந்தாலும் நிர்வாகம் பொறுத்துக்கொண்டு இருக்காது. நிச்சயம் தண்டிக்கப்படுவார்கள்” என்று கூறியுள்ளார். 

 ஆக்சிஸ் வங்கி மட்டுமல்ல, பல வங்கிகளிலும் சிலர் முறைகேடுகளில் ஈடுபட்டுள்ளார்கள். அப்படி ஈடுபட்டவர்களில் சிலர் கைதும் செய்யப்பட்டிருக்கிறார்கள். தமிழகத்தில் ஸ்டேட் பேங்க் ஆஃப் மைசூர், சாஸ்திரி நகர் கிளையின் மேனேஜர் லோகேஷ்வர ராவ் மற்றும் கேஷியர் இளங்கோவன் ஆகியோர் சமீபத்தில் கமிஷன் அடிப்படையிலான ரூபாய் பணப்பரிமாற்றத்தில் கைது செய்யப்பட்டுள்ளனர். அதேபோல் நங்கநல்லூர் ஆக்சிஸ் பேங்க் அசிஸ்டன்ட் மேனேஜர் முகேஷ், வேளச்சேரி கிளை அசிஸ்டன்ட் மேனேஜர் மணிகண்டன் ஆகியோரும் கைதுசெய்யப்பட்டுள்ளனர். இவர்கள் தங்களுடைய ஓட்டுநர்கள் மூலம் கமிஷன் முறையில் பணப்பரிமாற்ற முறைகேடுகளில் ஈடுபட்டுள்ளனர். 

அரசு கறுப்புப் பணத்தை ஒழிக்க எடுத்த செல்லாக்காசு நடவடிக்கை சாதாரண ஏழை மக்களைப் பெருமளவில் பாதித்தபோதிலும், அவர்கள் கறுப்புப் பணத்தை ஒழித்தால் சரி என்று ஏற்றுக்கொண்டார்கள். ஆனால் வங்கியாளர்களுக்கு, முறைகேடு செய்து சம்பாதிக்கும் அளவுக்கு வறுமை என்ன வந்துவிட்டது?

முகநூலில் எங்கள் செய்திகளை படிக்க க்ளிக் செய்யவும்


Loading...