News
Loading...

ஜனவரி 4-வரை தமிழகத்திற்கு தண்ணீர் திறக்க வேண்டும்:கர்நாடகத்திற்கு உச்சநீதிமன்றம் உத்தரவு..!

ஜனவரி 4-வரை தமிழகத்திற்கு தண்ணீர் திறக்க வேண்டும்:கர்நாடகத்திற்கு உச்சநீதிமன்றம் உத்தரவு..!

அடுத்த உத்தரவு வரும் வரை அடுத்தாண்டு ஜனவரி 4-ஆம் தேதி வரை தமிழகத்திற்கு காவிரியில் தண்ணீர் திறக்க வேண்டும் என உச்சநீதிமன்றம் கர்நாடக அரசிற்கு உத்தரவிட்டுள்ளது.
இதன்படி நாள் ஒன்றுக்கு 2000 கன அடி காவிரி நீரை தமிழகத்திற்கு அளிக்க வேண்டிய கட்டாயம் கர்நாடக மாநிலத்திற்கு ஏற்பட்டுள்ளது.

காவிரி நடுவர் மன்றத்தின் தீர்ப்பின்படி, தமிழகத்திற்கு உரிய காவிரி நீரை கர்நாடக அரசு அளிக்கவில்லை எனக் கூறி தமிழக அரசு உச்சநீதிமன்றத்தில் வழக்கு தொடர்ந்திருந்தது. இந்த வழக்கு ஒவ்வொரு முறை விசாரணைக்கு வரும் போதும், தமிழகத்திற்கு குறிப்பிட்ட அளவிற்கு கர்நாடக அரசு காவிரி நீரை திறக்க வேண்டும் என உச்சநீதிமன்றம் உத்தரவிட்டு வருகிறது.இந்நிலையில் இந்த வழக்கானது கடந்த டிசம்பர் 9-ஆம் தேதி மீண்டும் விசாரணைக்கு வந்தது.

தமிழக அரசின் மனுவை விசாரித்த உச்சநீதிமன்ற நீதிபதிகள், வழக்கு விசாரணையை வரும் டிசம்பர் 15-ஆம் தேதி வரை தள்ளிவைப்பதாகவும்,அதுவரை நாள்தோறும் 2,000 கன அடி காவிரி நீரை கர்நாடக அரசு தமிழகத்திற்கு அளிக்க வேண்டும் எனவும் தெரிவித்தனர். ஆனால் தங்கள் மாநிலத்தில் கடும் நீர் பற்றாக்குறை நிலவுவதால் உச்சநீதிமன்றத்தின் தீர்ப்பை செயல்படுத்த முடியாது என கர்நாடக அரசின் சார்பில் பதில் மனு தாக்கல் செய்யப்பட்டது.

இதனை தொடர்ந்து இரு மாநில அரசுகளின் மனுக்களையும் இன்று விசாரித்த உச்சநீதிமன்றம், காவிரி நீர் பங்கீடு தொடர்பான அனைத்து வழக்குகளையும் அடுத்தாண்டு ஜனவரி 4-ஆம் தேதி வரை ஒத்தி வைத்தது. அதுவரை தினந்தோறும் 2000 கன அடி வீதம் கர்நாடக மாநிலம் தமிழகத்திற்கு காவிரி நீரை அளிக்க வேண்டும் எனவும் உச்சநீதிமன்றம் உத்தரவிட்டுள்ளது.

முகநூலில் எங்கள் செய்திகளை படிக்க க்ளிக் செய்யவும்