News
Loading...

மன்னார்குடி ரீவைண்ட் ஜாதகம் - 3 - சசிகலா திருமணம்!

மன்னார்குடி ரீவைண்ட் ஜாதகம் - 3 - சசிகலா திருமணம்!

‘வெள்ளத் தனைய மலர்நீட்டம் மாந்தர்தம்
உள்ளத் தனையது உயர்வு’ 

என்ற திருக்குறளை எழுதி ஜெயலலிதாவின் படத்தைப் போட்டு ‘நீங்கா நினைவுகளுடன் அஞ்சலி’ என நாளிதழ்களில் விளம்பரம் கொடுத்திருந்தது கேரள அரசு. மூன்று நாள் துக்கம் கடைப்பிடித்ததோடு கேரள கவர்னர் சதாசிவம், முதல்வர் பினராயி விஜயன், எதிர்க்கட்சித் தலைவர்கள் உம்மன் சாண்டி, சென்னிதாலா என நால்வரும் ஒருசேர பயணிகள் விமானத்தில் மீனம்பாக்கம் வந்திறங்கினர். அங்கிருந்தும் அவர்கள் ஒரே காரில் பயணித்து வந்து ஜெயலலிதா உடலுக்கு அஞ்சலி செலுத்திவிட்டுப் போனார்கள்.

ஜெயலலிதா தொடங்கி வைக்கும் திட்டங்களுக்காக நாளிதழ்களில் பக்கம் பக்கமாக அரசு விளம்பரங்கள் பளிச்சிடும். 100 நாள் சாதனைக்காகக் கடந்த ஆகஸ்ட் மாதம் பத்திரிகைகளின் முதல் பக்கத்தில் ஜெயலலிதாவின் படத்தைப் போட்டு விளம்பரங்கள் கொடுத்தது அரசு. ஜெயலலிதா உயிருடன் இருந்தபோது காட்டப்பட்ட விசுவாசம் இது. அவர் சுவாசம் நின்று போனபிறகு ஒரு அஞ்சலி விளம்பரத்தைக்கூட கொடுக்க முடியாத அளவுக்கு அரசுக்குப் பண முடை போல! முல்லைப் பெரியாறு, அட்டப்பாடி, சிறுவாணி என தண்ணீருக்காக நம்மோடு மல்லுக்கு நிற்கும் கேரளம்கூட அஞ்சலி செய்கிறது. ஆனால், ஜெயலலிதா அஞ்சலியைவிட சசிகலாவுக்கு புகழாஞ்சலிதான் முக்கியம் என மூழ்கி கிடக்கிறார்கள் மாண்புமிகுக்களும் மக்கள் பிரதிநிதிகளும். இதற்குக் காரணம் சசிகலா!  ஜெயலலிதாவை தூரத் தள்ளிவைத்துவிட்டு சசிகலாவுக்குப் பல்லக்குத் தூக்கினால்தான் பதவியில் நீடிக்க முடியும் என்கிற அரசியல் ஆத்திச்சூடி தெரியாதவர்கள் அல்ல நம் அரசியல்வாதிகள்.

கருணாநிதியின் உடல்நிலையை விசாரிக்க அமைச்சர் ஜெயக்குமாரும் நாடாளுமன்ற துணை சபாநாயகர் தம்பிதுரையும் காவேரி மருத்துவமனைக்கு சசிகலாவின் சார்பில் போயிருக்கிறார்கள்.  ஜெயலலிதாவிடம் இல்லாத அரசியல் நாகரிகம் என்னிடம் இருக்கிறது எனச் சொல்லாமல் சொல்லியிருக்கிறார் சசிகலா. புதிய அரசியல் பாதை போட்டிருக்கும் சசிகலாவின்  திருமணம் எப்படி நடந்தது? 

மன்னார்குடிக்கு அருகில் இருக்கும் விளார் எம்.நடராஜனின் ஊர். படிப்பை முடித்த கையோடு அரசாங்க வேலையில் அமர்கிறார் எம்.நடராஜன். அரசு மக்கள் தொடர்பு அதிகாரி பணி. இந்த வேலை கிடைப்பதற்குப் பின்புலமாக இருந்தது அரசியல். 

தமிழ் ஆர்வமும் அரசியல் ஈடுபாடும் கொண்டது மருதப்பன் குடும்பம். மருதப்பனின் மகன்தான் எம்.நடராஜன். 1967-ல் தி.மு.க. முதன்முறையாக ஆட்சியைப் பிடிப்பதற்கு முன்பு வரையில், அண்ணா தலைமையில் தி.மு.க. கொள்கை அரசியலில் ஈடுபட்டிருந்தது. அப்போது மாணவராக இருந்த எம்.நடராஜன் அதில் தன்னையும் இணைத்துக்கொண்டார். அந்த நேரத்தில்தான் 1965-ம் ஆண்டு இந்தி எதிர்ப்பு போராட்டம் மாணவர்களால் கொழுந்துவிட்டு எரிந்துகொண்டிருந்தது. அதில் பங்கெடுத்தார் எம்.நடராஜன். தி.மு.க-வில் முக்கியப் புள்ளியாக இருந்து ம.தி.மு.க  தொடங்கப்பட்டபோது அங்கே போய் பிறகு தி.மு.க-வுக்கு திரும்பி வந்தவர் எல்.கணேசன். இவரின் சிஷ்யர்களில் ஒருவராக எம்.நடராஜன் அப்போது இருந்தார்.

மன்னார்குடி ரீவைண்ட் ஜாதகம் - 3 - சசிகலா திருமணம்!

1967-ல் தி.மு.க. ஆட்சியைப் பிடிக்கிறது. அண்ணா முதல்வர் ஆகிறார். 1969-ல் அண்ணா மறைந்துபோக, கருணாநிதி முதல்வர் ஆனார். அரசியல் பின்புலம் கொண்டவர்களை ஆட்சிப் பணிகளில் அமர்த்துவதற்காக ஆட்சியாளர்களே நேரடியாக நியமிக்கும் அதிகாரம்கொண்ட கொல்லைப்புற பதவிதான் மக்கள் தொடர்பு அதிகாரிகள். முதல்வரின் நேரடி சிபாரிசில் இந்தப் பதவிக்கு ஆட்கள் நியமிக்கப்படுவார்கள். 1969-ல் கருணாநிதி போட்டுத் தந்த இந்த பாதையில்தான் இன்றுவரையில் ஆட்சியாளர்கள் பயணிக்கிறார்கள்.

கருணாநிதி முதன்முறையாக முதல்வர் ஆனபோது உதவி மக்கள் தொடர்பு அதிகாரியாக (ஏ.பி.ஆர்.ஓ) ஆனார் எம்.நடராஜன். அரசு வேலை கிடைத்துவிட்டது. அடுத்து என்ன...திருமணம்தான். எம்.நடராசனுக்கு பெண் பார்க்கும் பணியை அவருடைய அக்கா பட்டம்மாளும் அவர் கணவர் சம்பந்தமூர்த்தியும் பார்த்துக் கொண்டிருந்தார்கள். உறவினர்கள் மூலம் திருத்துறைப்பூண்டியில் ஒரு பெண் இருக்கும் தகவல் கிடைக்கிறது. பெண் பார்க்கும் படலம் முடிகிறது. குடும்பத்தினர் `ஓகே’ சொல்ல... விளாரை சேர்ந்த நடராஜன், சசிகலாவைக் கரம் பிடிக்கிறார். அந்தக் காலக்கட்டத்தில் தஞ்சையில் முக்கிய தளபதியாக இருந்த மன்னை நாராயணசாமி தலைமையில்தான் திருமணமே நடைபெறுகிறது. ஏ.பி.ஆர்.ஓ போஸ்டிங் போட்டுத் தந்த கருணாநிதிதான்        எம்.நடராஜனின் திருமணத்தை நடத்தி வைக்கிறார். ‘இந்த சசிகலாதான் பின்னாளில், ஜெயலலிதாவுக்கு உடன்பிறவா சகோதரி ஆகப் போகிறார்; ஜெயலலிதாவுக்குப் பிறகு அ.தி.மு.க-வின் பொதுச் செயலாளராகவும் ஆகலாம்’ என்றெல்லாம் அப்போது கருணாநிதியே நினைத்திருக்கமாட்டார். ஆனால், காலம் நினைத்திருந்தது.

மண வாழ்க்கையை சென்னையில் ஆரம்பித்தார்கள் எம்.நடராஜன் - சசிகலா தம்பதி. அரசியல் ஆர்வம் கொண்ட எம்.நடராஜன், அரசியல் காய்களை நகர்த்தத் தொடங்கினார். கடலூரில் மக்கள் தொடர்பு அதிகாரியாகப் பணியாற்றிய காலத்தில்தான் அங்கே கலெக்டராக இருந்த சந்திரலேகா ஐ.ஏ.எஸ் மூலம் ஜெயலலிதாவுக்கு கவரேஜ் கொடுத்து லிஃப்ட் ஆனார். அதன்பிறகுதான் மனைவிக்கு ‘வினோத் வீடியோ விஷன்’ என்ற வீடியோ கடையை வைத்துக்கொடுத்தார். ஜெயலலிதா அ.தி.மு.க கொள்கைப் பரப்புச் செயலாளர் ஆனதும் தனது வெளியூர் டூர் பயணத்தை எல்லாம் வீடியோவில் பதிவு செய்ய நினைத்தார். அதைக் கச்சிதமாகப் பிடித்துக்கொண்டார் நடராஜன்.

மன்னார்குடி ரீவைண்ட் ஜாதகம் - 3 - சசிகலா திருமணம்!

ஏற்கெனவே கடலூர் டூர் புரோகிராமுக்கு கொடுத்த கவரேஜ் ஜெயலலிதாவுக்கு பிடித்துப் போயிருந்தது. முதல்வர் எம்.ஜி.ஆரும் ஜெயலலிதாவுக்கு முக்கியத்துவம் கொடுத்தார். எம்.ஜி.ஆருடன் நெருக்கமாக இருந்த பத்திரிகையாளர் சோலைக்கு வேண்டப்பட்ட ரங்கராஜனை அணுகினார் எம்.நடராஜன். அதனால் ஜெயலலிதாவின் டூர் கவரேஜ் சான்ஸ் சுலபமாக  ‘வினோத் வீடியோ விஷனு’க்கு கிடைத்தது. அ.தி.மு.க-வின் தலைமை அலுவலகத்தில் ஜெயலலிதாவை முதன்முறையாக சசிகலா சந்தித்தபிறகு அடுத்தடுத்து சந்திப்புகள் நடக்கின்றன. டூர் கவரேஜ் கேசட்டுகளை கொடுப்பதற்காக, வேதா இல்லத்துக்குள் போய் வருகிறார் சசிகலா. அதன்பிறகு என்ன நடந்தது?

முகநூலில் எங்கள் செய்திகளை படிக்க க்ளிக் செய்யவும்