News
Loading...

மன்னார்குடி ரீவைண்ட் ஜாதகம் - 6 - வேவும் காய் நகர்த்தலும்!

மன்னார்குடி ரீவைண்ட் ஜாதகம் - 6 - வேவும் காய் நகர்த்தலும்!

‘பூவே உனக்காக’ படத்தில் ஒரு காட்சி. ஹீரோ விஜய்க்கு திருமணம் ஆகிவிட்டதாகப் பொய் சொல்லி அதை நம்பவைக்க மனைவியிடம் இருந்து கடிதம் வருவதுபோல போலியாகக் கடிதம் எழுதுவார் சார்லி. அப்படி அவரே எழுதிய கடிதத்தைப் படிப்பார். ‘‘அன்புள்ள அத்தானுக்கு உங்கள் ஆசை நிம்மி எழுதிக்கொள்வது. இங்கு நான் நலம். அதுபோல் நீங்கள் மற்றும் உங்கள் உயிர் நண்பர் `உத்தமர்’ கோபி நலமா? அத்தான் உங்களுக்கு ஒன்று தெரியுமா? அரிது அரிது மானிடராய் பிறத்தல் அரிது, அதிலும் கோபி போன்ற ஒரு தெய்வப்பிறவி உங்களுக்கு நண்பராய் கிடைத்தது மிக மிக அரிது’’ என சார்லி படித்துக்கொண்டே போக... ‘‘என்னடா இது.... அவன் பொண்டாட்டி.... இவனைப் புகழ்ந்து எழுதியிருக்கா?’’ என மீசை முருகேசன் கேள்வி எழுப்புவார். இந்தக் கேள்வியைத்தான் அ.தி.மு.க-வினர் பலரும் எழுப்பிக்கொண்டிருக்கிறார்கள்.

ஜெயலலிதா இறந்தபோது அவருக்குக் கண்ணீர் அஞ்சலி போஸ்டர்கள், ஃப்ளெக்ஸ்கள் முளைப்பதற்குப் பதிலாக சசிகலாவின் படங்கள்தான் எங்கும் பளிச்சிட்டன. ஜெயலலிதாவுக்குப் புகழஞ்சலி செய்வதற்குப் பதிலாக, சசிகலாவுக்குப் பாதாஞ்சலி நடத்திக்கொண்டிருக்கிறார்கள். ‘உத்தமர் கோபி நலமா?’ என மாறியவர்களை விடுங்கள். அந்த இடத்துக்கு வந்த சசிகலா செய்த தியாகங்களைப் பார்ப்போம். 

ஜெயலலிதாவைக் கட்சிக்குள் கொண்டுவந்தபிறகு அம்மு மீது அதிக அக்கறை எடுத்துக்கொண்டிருந்தார் எம்.ஜி.ஆர். ஜெயலலிதா, கொள்கைப்பரப்புச் செயலாளர் ஆன பிறகு, அவரின் வெளியூர் சுற்றுப்பயணத்துக்கு முக்கியத்துவம் தரச்சொல்லி அப்போது கடலூர் கலெக்டராக இருந்த சந்திரலேகாவிடம் எம்.ஜி.ஆர் அறிவுறுத்தியிருந்தார். அதன்பிறகுதான் நடராஜன், சசிகலா தொடர்புகள் ஜெயலலிதாவுக்கு ஏற்பட்டன. அந்தக் காலகட்டத்தில் தனக்கு மிகவும் நெருக்கமாக இருந்த பத்திரிகையாளர் சோலையிடம், ‘‘அம்முவுக்குத் துணையாக நம்பிக்கைக்குரிய ஒருவரை வைக்க வேண்டும். யாரை அனுப்பி வைக்கலாம்?’’ எனக் கேட்டார் எம்.ஜி.ஆர்.  சசிகலா உட்பட பலருடைய பெயர்கள் அடிபட்டன. அப்போது, டி.ஜி.பி-யாக இருந்த மோகன்தாஸிடம் ஆலோசிக்கப்பட்டிருக்கிறது. அடுத்து சசிகலா பற்றி உளவுத்துறை விசாரிக்க ஆரம்பித்தது. ரிப்போர்ட் நல்லவிதமாக வந்தது. 

போலீஸ் அதிகாரி தனுஷ் என்பவர்தான் இதுபற்றி நடராஜனிடம் பேசியிருக்கிறார். அதே நேரம் ஜெயலலிதாவிடம் கருத்துக் கேட்டிருக்கிறார்கள். இரண்டும் ஒரே நேர்க்கோட்டில் வந்ததால் சசிகலா ஓகே செய்யப்பட்டார். பத்திரிகைகளில் கவரேஜ் கொடுத்தது, வீடியோ கேசட், நாடாளுமன்றக் கூட்டத் தொடருக்கு வந்து உதவியது என எல்லாம் சேர்ந்து சசிகலா மீது ஜெயலலிதாவுக்கு மதிப்பு கூடியிருந்தது. அதனால், ‘‘சசிகலா என்றால் ஓகேதான்’’ என்றார் ஜெயலலிதா. 

மன்னார்குடி ரீவைண்ட் ஜாதகம் - 6 - வேவும் காய் நகர்த்தலும்!

எம்.ஜி.ஆர், ஜெயலலிதா, சசிகலா என்கிற இந்த முக்கோணத்துக்குப் பின்னால், ஓர் அரசியல் உண்டு என்ற பேச்சும் இருக்கிறது. ‘அடுத்த வாரிசு’ என்கிற அங்கீகாரம் பாக்யராஜுக்குக் கிடைத்தப் பிறகு தனக்கு முக்கியத்துவம் தரவேண்டும் என எம்.ஜி.ஆரை ஜெயலலிதா நச்சரிக்கத் தொடங்கிய காலம் அது. அதனால், ஜெயலலிதாவைக் கண்காணிக்க நினைத்தார் எம்.ஜி.ஆர் அதற்காக சசிகலாவைப் பயன்படுத்திக்கொள்ள முடிவு செய்துதான் இப்படியொரு பிளான் போட்டார் என்று இன்னொரு கோணமும் சொல்லப்படுகிறது. ஜெயலலிதா அருகிலேயே ஓர் ஒற்றர் இருந்தால் நல்லது என்று கணக்குப் போட்டுதான் சசிகலா தேர்வை எம்.ஜி.ஆர். நடத்தினார். நடராஜன் ஏற்கெனவே அரசு வேலையில் இருக்கிறார். அவர் மனைவி சசிகலா, ஜெயலலிதா அருகில் இருந்தால் அது நமக்கு வசதி என முடிவு செய்துதான் சசிகலாவை ஜெயலலிதாவுக்குத் துணையாக நியமித்தார்கள். ‘அங்கே என்ன நடக்கிறது... யார் யார் வந்து போகிறார்கள் என்கிற விவரத்தை எல்லாம் தெரிவிக்க வேண்டும்’ என்ற நிபந்தனையை ஏற்றுக்கொண்டனர்  சசிகலா தம்பதியினர்.

அரசு வேலையில் இருப்பதால் முதல்வர் எம்.ஜி.ஆருக்கு கட்டுப்பட்டுத்தான் இருக்க வேண்டும்... அதை மீற முடியாது என்பது நடராஜனுக்குத் தெரிந்திருந்தது. ஆனால், ஜெயலலிதாவின் பொதுக்கூட்ட கவரேஜ் அசைன்மென்டை பார்த்த மாத்திரத்திலேயே எம்.ஜி.ஆருக்கு அடுத்த இடத்தில் ஜெயலலிதாதான் வருவார் என கணித்தார் நடராஜன். நிகழ்காலத்தில்  எம்.ஜி.ஆருக்கும் எதிர்காலத்துகாக ஜெயலலிதாவுக்கும் வேலைகளைப் பார்த்தார்கள் நடராஜனும் சசிகலாவும். போயஸ் கார்டனுக்குள் அவ்வப்போது போய்வந்துகொண்டிருந்த சசிகலா, ஒரு கட்டத்தில் அங்கேயே நிரந்தரமாகத் தங்கத் தொடங்கினார்.

முகநூலில் எங்கள் செய்திகளை படிக்க க்ளிக் செய்யவும்