News
Loading...

முதல்வர் ஜெயலலிதா மறைந்து ஒரு மாதமாகியும் விடை கிடைக்காத சோகத்தில் தமிழகம்!!

முதல்வர் ஜெயலலிதா மறைந்து ஒரு மாதமாகியும் விடை கிடைக்காத சோகத்தில் தமிழகம்!!

மிழக முதல்வர் ஜெயலலிதா காலமாகி இன்றுடன் ஒரு மாதம் நிறைவடைந்துள்ளது. ஆனாலும், அவரது சாவில் மக்களுக்கு எழுந்துள்ள சந்தேகமும், ஆதங்கமும், மறைந்துள்ள உணமைகளும், மக்களிடையே உறைந்துள்ள சோகமும் நீங்கவில்லை.

தமிழகத்தின் முதல்வராக இருந்த ஜெயலலிதா கடந்த செப்டம்பர் 22 ஆம் தேதி இரவு திடீரென அப்பல்லோ மருத்துவமனையில் சிகிச்சைக்காக சேர்க்கப்பட்டார். இந்த செய்தி மறுநாள் காலை தீயாக பரவியது. மருத்துவமனையோ, ஜெயலலிதாவுக்கு நீர்ச்சத்து குறைபாடு, காய்ச்சல் என்று கூறியது. இன்று சரியாகிவிடும், நாளை சரியாகிவிடும் என்று கூறிய மருத்துவமனை தாமதமாக மருத்துவ அறிக்கையை வெளியிட்டது. நுரையீரல் தொற்று, சிறுநீரகக் கோளாறு என்றும் அவருக்கு செயற்கை சுவாசம் அளிக்கப்படுகிறது என்றும் தெரிவித்தனர். இவரைப் பார்க்க பொறுப்பு கவர்னர் வித்யாசாகர் ராவ் சென்றார். நேரில் ஜெயலலிதாவை அவரும் பார்க்கவில்லை. இவரைத் தொடர்ந்து அரசியல் பிரமுகர்கள் சென்றனர். அவர்களும் ஜெயலலிதாவை நேரில் பார்க்கவில்லை.

நாட்கள் கடந்தது அதிமுக தொண்டர்கள் தனது தலைவியை பார்க்க மாட்டோமா என்ற ஏக்கத்தில் கோயில், குளம் சென்று பூஜைகள் செய்தனர். மருத்துவமனையில் இரவு, பகலாக காத்துக் கிடந்தனர். ஆனாலும், அரசு சார்பில் அல்லது கட்சி சார்பில் மருத்துவமனையில் அவர் சிகிச்சை பெற்று வரும் புகைப்படத்தை வெளியிடவில்லை.

உடல் நலம் தேறி வருகிறார். சாப்பிடுகிறார், டிவி பார்க்கிறார். அவருக்கு பிசியோதெரபி சிகிச்சை அளிக்கப்படுகிறது. இடைத்தேர்தலில் கட்சி வேட்பாளர்கள் போட்டியிட விரல் ரேகை வைத்து அறிக்கை வெளியிட்டார். தேர்தல் முடிவுகளை டிவியில் பார்த்தார். பேசப் பழகுகிறார். எழுதிப் பழகுகிறார் என்றெல்லாம் கூறப்பட்டது.

மக்களிடம் இருந்து அழுத்தம் அதிகரிக்க தீபாவளி முடிந்து முதல்வர் வீடு திரும்பலாம். அவர் விரும்பும்போது திரும்பலாம் என்றெல்லாம் அந்த மருத்துவமனையின் தலைவர் பிரதாப் ரெட்டி தெரிவித்து இருந்தார்.

ஆனால், தமிழக மக்களுக்கும், அதிமுக தொண்டர்களுக்கும் தொண்டை அடைக்கும் செய்தியாக 75 நாட்கள் கழித்து ஜெயலலிதா காலமானார் என்று கடந்த டிசம்பர் 5 ஆம் தேதி மருத்துவமனை சார்பில் அறிவிக்கப்பட்டது. இந்த சோகத்தை இன்றளவும் தமிழக மக்களாலும், அதிமுக தொண்டனாலும் ஜீரணிக்க முடியவில்லை. அதிமுக தொண்டனுக்கு இன்றும் தனது தலைவி எப்படி இறந்தார் என்ற உண்மையும் கிடைக்கவில்லை. புலம்பித் திரிகிறார்கள் உண்மை விசுவாசிகள். இன்றுடன் ஒரு மாதமும் முடிந்துவிட்டது. ஆனால், அவரது இனிய முகம்தான் ஒவ்வொரு அதிமுக தொண்டனுக்கும் நினைவில் நிற்கிறது சோகத்துடன். 

முகநூலில் எங்கள் செய்திகளை படிக்க க்ளிக் செய்யவும்